ينفع ؟؟

لو انتا مكان جمال مبارك ؟

هتبقى زيه ؟

ها ؟؟؟

في حد هيقول لأ ؟

بصراحة ربنا

انا لو كنت مكانه كنت هبقا زيه

بس يمكن كنت هخلي الناس تحبني بجد

لانه مش حاطط الموضوع ده في دماغه اصلا !!

-------

ده نص حوار بيني وبين واحد صاحبي

قالي كلمتين وسابني ومشي

لو احنا فعلا لو مكانه مكناش هنعمل كده

مكناش ابتلينا بيه !!!

بصراحة ربنا

عنده حق

البلد باظت

المكان : شارع المحافظة في المنصورة

امام مركز الادارة العامة لمكافحة المخدرات

الزمان : يوم السبت اللي فات الساعة 11 بلليل

على بعد 20 متر من بوابة المركز في عربية راكنة

العربية فيات مية تمنية وعشرين حمرا متجنطة وجواها اربع شباب

واللي سايق فاتح الباب

انا معدي من جنبهم وراجل كبير ماشي جنبي

ايه المشكلة بقا ؟؟

المشكلة ....ان الشباب اللي في العربية كانو بيشربو حشيش

بقول للراجل اللي جنبي ؟؟

يا نهار اسود .. بيشربو حشيش قدام الادارة العامة لمكافحة المخدرات ؟؟

الراجل قالي كلمة واحدة بس

فُـٌُجـر :

وانا من هذا المنبر احيي رجال الشرطة البواسل في الادارة العامة لمكافحة المخدرات

وعاشت بلدنا حرة قوية وكلها حنية

والحمد لله نجحنا في مشروعنا القومي : الحشيش للجميع

وكباية الحشيش بقت ولله الحمد متوفرة في كل مكان

صحرا كان او بستان

والله اكبر فوق كيد المعتدي

اللهم اني مش علماني

بعيدا عن النقاشات السفسطائية عن العلمانية ونشأتها وفائدتها وحلاوتها

هدخل في الموضوع علطول

الاستاذ الكاتب الكبير العظيم الصحفي حمدي رزق ذكر في مقالة له في اخبار اليوم يوم السبت الماضي

التي جائت تحت عنوان ((هل ابو جهل كان علمانيا )) والله عنوان المقالة كده

المهم الاستاذ حمدي كان بيدافع عن وجهة نظره في العلمانية بطريقته الخاصة

وفي وسط الكلام قال جملة فظيعة هيا ان الاغلبية الساحقة من المدونين علمانية تماما ؟؟

اه وربنا حمدي رزق قال كده

الاغلبية الساحقة من المدونين علمانية تماما

اموت واعرف الاستاذ حمدي رزق بيتكلم عن انهي اغلبية

او انهو مدونين ؟؟؟

انا حبيت اعمل استطلاع رأي في المدونة لمعشر المدونين اسألهم فيه ؟؟

هوا انتم علمانيين ؟؟

عشان نعرف مصداقية الاستاذ العلامة حمدي رزق

وعلى فكرة يا استاذ حمدي

بما انك عارف المدونات وبتشوفها وممكن تشوف المدونة دي في اي وقت

فبحب اقولك اني مش اخوان والله العظيم ..عشان بس متجهزش السكاكين وتقول

اقتلو هذا الاخواني الفاجر عدو العلمانية

ولا انا ارهابي متشدد متطرف رجعي متزمت ارهابي وهابي

اي ورب الكعبة

انا بس مش مقتنع بالعلمانية خالص

بس خلاص

بس حبيت اعرف هل فعلا الاغلبية الساحقة من المدونين علمانية تماما

ياريت تشاركونا يا اخواننا

هتلاقو الاستفتاء في السايد بار على الشمال

صوت وقول هل انتا مدون علماني ولا لأ ؟؟

مستني تعاونكم

نخلة وحجازي وحرية الاعتقاد

هل شاهدت حلقة امس في برنامج العاشرة مساءا ؟؟

هل شاهدت الفقرة التي جاء فيها بان احد المواطنين المصرييين المسلمين ويدعى محمد حجازي اعتنق المسيحية ويريد تغيير ديانته في الاوراق الرسمية ؟؟

اذا كنت لم تشاهدها

فيستحسن ان تبحث عنها لتراها

واذا كنت شاهدتها

فهل رأيت الفقرة التي يجلس فيها المحامي القبطي النخلة ممدوح نخلة

على مكتبه مجعوص ليقول بصوت رخيم

ان هذه القضية هي اول قضية تعرض على القضاء المصري من هذه النوعية

وانها تابعة لحرية الرأي والعقيدة والتعبير وحرية الاعتناق

ومن شاء فليؤمن ومن شاء فليكفر

..

اولا قبل ان اعلق على اي شيء

اعلن اني بكره المخلوق اللي اسمه ممدوح نخلة ده

مبطيقوش .. وكل ما اشوفه بتنكد

انا مش هتهمه بالاتهامات المعروفة بالمتاجرة بقضايا الاقباط المسيحيين

وانه بيسعى للشهرة او الى اخر الكلام

لكن هقول موقف زمان شفته للشخص ده قبل ما يبدأ يشتهر شوية على حس قضية الاقباط اللي الاخ عامل نفسه ممثل للاقباط وفي كل مكان بيتحدث باسمهم

ايام حوار كريم عامر..او عبد الكريم سليمان ..ايوة المدون اللي شتم النبي صلى الله عليه وسلم والاسلام باحط الالفاظ والعبارات

في استهانة بالغة بمعتقدات ومشاعر ملايين المسلمين

كانت بطبيعة الحال المواقع القبطية التابعة لاقباط المهجر تتلقف كريم عامر وتتبنى حملات الدفاع عنه

باعتباره رمزا لحرية التعبير والديموقراطية وحرية الاعتقاد

في استفزاز كبير لمشاعر المسلمين الذين يرون اشخاص مخالفين لهم في الدين يستميتون في الدفاع عن شخص اهان دينهم ومعتقداتهم

في احد المواقع دي شفت فيديو

يظهر فيه فضيلة المناضل العظيم الكبير عبد الكريم سليمان وبجانبه المحامي النخلة ممدوح نخلة

والاخ نخلة بيجري حوار معاه و (( بيطرح )) الاسئلة .. نخلة بقا

وبيكلمه بيقوله : المفكر الكبير عبد الكريم نبيل سليمان

كريم عامر الشتام السباب بقا مفكر كبير يا نخلة !!!

في استفزاز ثاني لمشاعر الناس

وقعد ممدوح نخلة يكلمه ويعظم فيه الخ الخ الخ

انا من ساعة ما شفت الفيديو ده من فترة

وقبل ما اعرف مين هوا ممدوح نخلة

كرهت الشخص ده ... بعد ما حقيقته بانت بانه واحد من مشعلي الفتنة اللي عايزين يتكسبو وينالو الشهرة وراء المتاجرة بقضايا الاقباط..وان الوحدة الوطنية و الملوخية دي ما هيا الا شعارات بيرفعها وقت اللزوم

لكن وقت الجد كل الشعارات دي بتتبخر وتطير وتيجي بدلها الافكار والمعتقدات اللي فعلا نخلة بيؤمن بيها

..

والدليل على كده موقفه من قضية ماكس ميشيل

فكما يقول شريف نجيب صاحب مدونة هدوء نسبي

ــــــــــــــــــــ

طبعاً فاكرين معارك حقوق البهائيين التي شغلت الرأي العام لفترة و راحت لحال سبيلها.فاكرين بقى الأستاذ ممدوح نخلة المحامي بتاع مركز الكلمة لحقوق الإنسان ؟و كلامه الإنساني عن حرية العقيدة و ممارسة الشعائر الدينية .. و إنتقاده لما وصفه بالإنتهاك الصارخ لحرية العقيدة آنذاك.. و فرض أصحاب دين الأغلبية أنفسهم حكاماً على الأخرين .. و الفهم الديني في مواجهة الفهم الإنساني للحرية العقائدية .. حسنا.. لقد قام الأستاذ نخلة مشكوراً بالطرطرة على كل هذا الكلام

.ففي خِضَّم ما يحدث هذه الأيام من إنشقاق في الكنيسة يقوده السيد ” ماكس ميشيل حنا ” الذي رسَّم نفسه بطريركاً لكيان كنسي جديد. يفاجئنا الأستاذ نخلة بتحوره إلى إلى عبده روتين يتحدث عن تصريحات الداخلية المطلوبة لإنشاء الكنيسة الجديدة و يذكرنا باللوائح و القوانين التي طالما انتقدها و يرفع القضايا ليمنع مجموعة من الناس من ممارسة العقيدة بالطريقة التي يريدونها !

ــــــــــــــــــــــــــ

لقرائة بقية التدوينة

يرجى قرائتها قبل اكمال تدوينتي

..

المهم عشرات المواقف تبين حقيقة الشخص ده وازاي انه مجرد مدعي للحرية ومروج للشعارات البراقة

طبعا فاكرين ازمة السيدة وفاء قسطنطين ؟؟

مش فاكرين ؟؟

طيب لو فاكرين ان السيدة وفاء قسطنطين زوجة قسيس اعلنت اسلامها لكامل ارادتها

وتم اختطافها في دير وادي النطرون واجبارها للعودة للمسيحية

وحتى الان لا يعلم اي احد هل هي حية ام ماتت

وقتها لم نر نخلة يجلس مجعوصا ليتحدث عن حرية العقيدة

وحرية الاعتقاد و ومن شاء فليؤمن ومن شاء فليكفر

بالعكس وقف موقفا متحيزا وسافرا بجانب الكنيسة في فعلتها باختطاف وفاء قسطنطين

واندلعت مظاهرات الاقباط المسيحيين وحدثت بها الكثير من اعمال الشغب

ورخضت الحكومة لمطالب اقباط المهجر وضغوط الادارة الامريكية

ولا يعلم اي احد ما هو مصير السيدة وفاء حتى الان

.

كل هذا ويأتي نخلة ليتحدث عن حرية الاعتقاد الان وان من حق محمد حجازي ان يعتنق المسيحية

انا لا اهتم بمحمد حجازي هذا او غيره

يبقا مسلم ..يكفر .. يتحرق بجاز .. احنا مالنا ؟؟

بسم الله الرحمن الرحيم

وَكُلَّ إِنْسَانٍ أَلْزَمْنَاهُ طَائِرَهُ فِي عُنُقِهِ وَنُخْرِجُ لَهُ يَوْمَ الْقِيَامَةِ كِتَابًا يَلْقَاهُ مَنْشُورًا(13)اقْرَأْ كِتَابَكَ كَفَى بِنَفْسِكَ الْيَوْمَ عَلَيْكَ حَسِيبًا

13-14 (الإسراء)

وكل شخص مسؤول عن نفسه وربنا سبحانه وتعالى هيوفيه حسابه يوم القيامة

وزي ما في جواسيس خانو بلادهم وراحو غيرو دينهم عشان يتجسسو لحساب اسرائيل

عشان حفنة من الدولارات

فمن الممكن ان شخص يعمل نفس الشيء لخدمة اجندات جهات خارجية تريد شعللة هذا البلد وايقاع الفتنة فيه

وطبعا سيجد الكثير من الوصوليين الافاقين اللي بيحاولو الوصول للشهرة والمال عن طريقة المتاجرة في القضايا دي

وهذا شيء وارد جدا جدا جدا

خصوصا بعد ما كشفته مدونة

..

الحقيقة المصرية

..

تحت عنوان

بعت دينك بكام يا حجازي

و

وداعا يا من كنت صديقي

يكشف فيه صاحب المدونة علاقته بحجازي

وكذبه على وسائل الاعلام بانه اعتنق المسيحية منذ كان في السادسة عشر من عمره

كما انني لاحظت الخبر في احد مواقع اقباط المهجر يقول بان محمد اعتنق

المسيحية منذ 4 سنوات فقط بعكس ما قاله محمد نفسه

فقط اريد ان اسأل لماذا لا يتم التعامل بالمثل في قضايا اشهار اسلام المسييحين والمسييحيات ولدينا عشرت النماذج الان

ولماذا وقت ان اعتنقت وفاء سلطان وغيرها الاسلام لم يكن ذلك تابعا لحرية الاعتقاد .؟؟

وايضا

بعد كل هذا اتسائل تسائل بسيط جدا ومشروع

يا ترى من هي الجهة التي تهدف الى اثارة هذه الزوابع والقلاقل والفتن في مصر

ومن هي الايادي الخفية التي تحاول اشعال النار في مصر ووقوع حرب اهلية طائفية بين المسلمين والمسيحيين ؟؟

مبارك وحماس ...يا قلبي لا تحتاس

من يتابع تصريحات الرئيس مبارك ورجال حكومته وحزبه في الفترة الاخيرة

عن اخر التطورات الحاصلة في الاراضي الفلسطينية

بين حركة المقاومة الاسلامية حماس والتيار الانقلابي من حركة فتح

واعتبار الرئيس مبارك ان ما فعلته حماس من محاربة انقلابي فتح الخارجين عليها

((انقلابا على الشرعية ))

يحس بالدهشة الشديدة والاستغراب الشديد ايضا من تلك الجرأة التي يعلن بها مبارك رأيه

الموالي تماما لموقف الحكومة الصهيونية والادارة الامريكية

في محاربة حركة حماس

..

..

وعندما تستمع ايضا الى

تصريحات وزير الخارجية احمد ابو الغيط

عن ان ايران تقف وراء حماس وتشجعها

وان حماس خطر على الامن القومي لمصر

وتصريحات امير التزوير في العالم العربي مصطفى الفقي

ووصفه لحماس بانها قنبلة موقوتة

ومئات المقالات من ائمة الضلال في الصحف القومية

من المنافقين والمشتاقين واللحاسين

والمطبلين الذين اتخذو من حرب النظام المصري على جماعة الاخوان المسلمين

حافزا لتقطيع فروة حركة حماس وسب وقذف رموزها

تحس بانك تحلم ولست تعيش في الواقع

..وليس اي واقع

بل هوا واقع مهم جدا وسيؤثر على مستقبل قضية فلسطين المحتلة لسنوات طويلة

..

سبحان الله

النظام المصري لا يقبل بوجود دولة اسلامية على حدوده الشرقية

ويقبل بل ويذعن ويتعامل ويطبع مع الدولة اليهودية

((او الكيان اليهودي ))

الموجود على حدوده الشرقية

..

في اواخر الثمانينات واوائل التسعينات

شن النظام المصري حربا بلا هوادة على الجماعات الجهادية المصرية

التي اعلنت الحرب هيا الاخرى على النظام المصري الكافر

واستباحت دماء السياح وافراد النظام

والمصريون يتذكرون جيد

ما فعلته وزارة الداخلية وقتها

حينما قتلت المئات من افراد هذه الجماعات

واعتقلت الالاف منها

ومنهم الكثيرين ممن يقبعون في السجون حتى هذه اللحظة

..

وقتها لم نسمع احدا من افراد النظام القائم يصف ما حدث

بانه انقلاب على الشرعية

او

اقتتال داخلي

او حرب اهلية بين ابناء البلد الواحد

او ما نسمعه هذه الايام مما يقال على ما فعلته حماس بالتيار الانقلابي الخارج على شرعيتها

الذي عاث في الارض فسادا وقتل العشرات من الابرياء

ومحاولة بث الفتنة في غزة للضغط على حكومة حماس

..

استغرب تماما

ان مبارك الذي اعطى الاوامر لوزراء داخليته واحدا بعد الاخر

بمحاربة الارهابيين والقضاء عليهم تماما مهما تكلف الامر ومهما كانت الوسائل للحفاظ على امن الوطن

يجرم ما فعلته حكومة حماس بالخارجين عليها من التيار الانقلابي

بل ويتهم حماس بالدعم من الخارج ويصف ما تفعله بانه خروج على الشرعية

!!

واكاد اجن وانا استمع لرموز النظام وهم يصفون افراد التيار الانقلابي

بانهم

((اخوان حماس في الجهاد ))

((رفقاء درب النضال ))

((رفقاء الكفاح ))

((ابناء الوطن الواحد))

وما هم الا مجموعة من المرتزقة المجرمين يقودهم قواد خائن لدينه ووطنه

يدعى محمد دحلان

..

..

لدي سؤال بسيط

لو كنت مكان رئيس وزراء فلسطين الشرعي المنتخب

وخرج عليك تيار انقلابي مدعوم صهيونيا وامريكيا بغرض التشويش عليك واثارة الفتنة

لخلعك من الحكم برغم شرعيتك

وعاث في غزة فسادا وقتل الشباب وسرق المحال التجارية

ماذا كنت ستفعل ؟

ابــوه مــســـافـــر

لم اصدق نفسي وقتها ..

معقولة ؟؟

بقا انس يطلع كده ؟؟؟

قلتها وردتتها كثيرا ..

انس ؟؟

يا ربي

نبدأ الحكاية

بداية من هو انس ؟؟

انس احد زملائي في الكلية ..شاب طويل القامة عريض المنكبين شلولخ

شاب روش الى حد ما

في اول

السنة كان يجلس معي ويحكي لي معاناته مع والده

الاستاذ الجامعي بكلية الهندسة جامعة شبين الكوم في المنوفية

وكيف ان والده رجل شديد

وانه يضيق عليه الخناق كثيرا بسبب تطويله لشعره او طريقة لبسه او اشياء اخرى

لم اكن اتأثر كثيرا ..فابو انس كان كالاغلبية العظمى من الاباء

في المجتمع المصري

وكلنا نعرف ذلك

ولكنني استرجعت كلام انس وما حكاه لي عن والده

حينما حدث ما حدث منذ ثلاثة ايام ..

ثلاثة ايام فقط

..

منذ ثلاثة ايام جلست مع انس في كافتريا الكلية

لاتحدث اليه

قلت له ان الكارت الخاص بوالده والذي كان قد اعطاه لي في اول السنة قد

ضاع مني

واني اريد كارتا اخر

نظر الي نظرة غريبة وقال

: ايوة انتا عايز الكارت ليه يعني ؟؟

قلت له

: يا عم انتا اديتهوني في اول لسنة وضاع

وياريت فخامتك تتواضع وتتكرم وتنزل شوية من مستواك وتديني كارت تاني

ضحك انس ضحكة عالية

وقال لي

: معلش اصل والدي مسافر دلوقتي

وقبل ان اسأله الى اين سافر والده

باغتني ضاحكا

مسافر شوية لطره

ضحكت كثيرا ..فقد اعتقدت انه يمزح ..خصوصا وانه يقولها وهوا يضحك

فقلت له وانا اكاد اقع من طولي من شدة الضحك

: ليه هوا معتقل ولا ايه ؟؟

فوجدته يقول لي بطريقة سعيد صالح الشهيرة

اه .. هههههه معتقل اه ..ههههههههههههه

صدمت وقتها صدمة شديدة !!!

وقلت

ايه ده انتا بتتكلم جد ؟؟

جاء رده مباغتا

اه والله

لتقع الكلمة على قلبي كالصاعقة

فاقول له والذهول على وجهي

هوا والدك مين ؟؟

قال لي

الدكتور محمد عياد

سألته هل هوا من الاخوان

فاجاب

اه

يا الله ... والدك يا انس هو الدكتور محمد عياد ؟؟

..

..

احد كوادر الاخوان المسلمين في المنوفية والذي تم القاء القبض عليه يوم الاحد قبل الماضي

مع نائبي مجلس الشعب

رجب أبو زيد و صبري عامر

لا اله الا الله

احسست تجاه انس باحساس غريب

غريب جدا

يا الله يا انس

فك الله اسرك يا دكتور محمد

فك الله اسرك

انت وكل اخوانك المسلمين في سجون حسني مبارك

اللهم فك اسر كل معتقل بالباطل من اخواننا المسلمين

اللهم فك اسر اخي عبد المنعم محمود وسائر معتقلي الاخوان المسلمين

..

يا حرية فينك فينك

حسني مبارك بيننا وبينك

اعفن يوم في تاريخ البشرية

من بين أستار الليل‏..‏ يطلع الفجر‏..‏

ومن بين حجب الغيام‏..‏ تشرق الشمس‏.

.‏ ومن قلب الشدائد والمحن‏..‏ يولد الأبطال العظام‏

ومن ورا باب الحمام ..تجري الصراصير والفيران

...

اليوم هوا اسعد واجمل واظرف والطف ايام حياتي

حقيقة ..لا اجد من الكلام لاقوله في تلك المناسبة السعيدة المجيدة

ربااااااااااه ؟؟

والله تترقرق عيناي ... وتزرفان الدموع كما يزرف الشاب صديقه على قفاه

يالله .. ما هذه الاحاسيس والمشاعير التي احس بها ؟؟

مش قاااااادر امسك نفسي

مش قاااااااااادر

ولازم اعترفلكم

نعم ايها الاخوة الافاضل والاخوات الفاضلات

نعم

نعم

نعم كمان مرة

ان اليوم من الايام الفاصلة في تاريخ البشرية المهول المليئ بالصراعات والبريصات

اليوم هوا عيدنا

بل انه يوم عيدنا

والله انه يوم عيدنااااااا

سيبني يا جدع منك ليه

انهووووووووو يوم عيدنااااااا

والله العظيم يومووووو عيدناااااا

بل عيد للبشرية جمعاء

يا للهول ..يا للهول

انه يوم ليس كبقية الايام

انه يوم ميلاد رئيسنا وحبيبنا وزعيمنا وتاج راسنا وقرة عيننا

فخامة جلالة عظمة جناب غبطة الزعيم القائد المناضل

مبارك

فاليوم يوم مبارك

والعيد عيد مبارك

فكلنا مبارك وكلكم غصب عن اللي جايبنكم مبارك برضه

انه عيد ميلاده

فلنغني له

فلنغني له

هيا فلنغني له

ولا اقولكم ...

فلنغني له

يالا حالان بالان بالان ...هنو ابو الفساد

حيث عيد ميلاده الليلة اوسخ الاعياد

طب هنو ابو الفساد

هييييييييييييه

وادي كمان تهنئة للريس

اشطة

مظبتكم اهو

.........

عدت سنة يا ريس

عدت علينا بالتمام

سنة سعيدة عليك يا ريس

بس ليه عندك كلام

عايزين نشوف ياريس فرحة من غير دموع

أصل شعبك يا ريس من الهم بقى موجوع

كل حاجة يئست معانا أحلامنا ويا صبانا

و اللي عايش معانا

أحزان في الضلوع

شبعنا خلاص يا ريس

شبعنا منك كلام

سنين عدت يا ريس

و أحنا في نفس المكان

إيران قالتها لأ

للعالم مافيش ممنوع

من حقنا نصنع نووي

و في بلادنا يكون موجود

و ليه لأ مش معانا

و كل كلامنا بقى مرفوض

شوف خسرنا قد آيه يا ريس

و بقينا دولة ملهاش وجود

مونديال الفين و عشرة طلعنا من غير أي صوت

دي فضيحة ليك ياريس

و سياستك ما ليها صوت

بتمنى و ياريت يا ياريس

تخلي للظلم حدود

لا فلوسنا تطلع برا

و لا بالأهمال نموت

...

واخر كلامنا

ان ..

..
ياريسنا

معاك بجد كان قلبى طيب

ما قولتش أنا غير حاضر وطيب

وأنت غاوى وعود فى الهوا....

كل سنة بئة وأنت طيب

؛؛ الــخــابـــور ؛؛ في تعديل الدستور

الحزب الوطني

!! عالجزمة

............

انساتي سيداتي اخواتي الفاضلات

كل سنة وانتو متدسطرين

وكل دسطور ودسعجل وانتو طيبين

وعلى رأي اخونا هريدي راعي القهوة الهريدية

!! واركب الدستووووووور .... ..وادستر ..درجن درجن !!

...

.

..

والان نلتقي ببعض الاخوة المواطنين المعفنين

لنسألهم عن رايهم في التعديلات الدستورية

واول جربان معانا

اسم حضرتك ايه ؟

برعي محمد جرجس -

ايه راي حضرتك في التعديلات الدستورية

الاخ برعي يجيب عن السؤال كأنه شايف وحش بري قدامه

بص يا بيه والله العظيم تلاتة -

والله حضرتك انا معرف حاجة عن الموضوع ده

انا لسه جديد في المنطقة هنا

...

..

نروح للمواطن المعفن التاني

اسم حضرتك ايه ؟؟-

ابو كلبة سليم ابن المخلخل

ايه راي حضرتك في التعديلات الدستورية -

ابو كلبة ينتفض من مكانه ويقول باعلى صوت عنده

هوا اللي نعرفه حضرتك هوا ان الريس عشرة على عشرة -

بس

هوا الريس حسني مبارك

هوا مية مية ..واللي بيقولو مية مية

والكبدة صح الصح من طرف اخوكم اللمبي

..

...

نروح للمواطن الجربان الثالث

اسم حضرتك ايه ؟؟

هيثم سامية عنايات ام السعد -

ايه راي حضرتك في التعديلات الدستورية -

حضرتشك التشعديلات دي جامدة مووووووووت

لذيذة تووووو ماتش

تخيل حضرتشك وانا واقف مع البوي فريند بتاعي

وبنتشكلم في الموضوع ده

لقيته معترض وبيقول انه مش موافق على التشعديلات دي

تخيل حضرتك

- الاخ هيثم بيعيط وهوا بيقول الجملة دي -

قولتشله لأأ

الا التشعديلاااات

لحد كده وتقف عند حدودك

احنا لازم نسيب بعض

يعني تخيل حضرتشك سبت البوي فريند بتاعي عشان خاطر طنط تعديلات

وانا موافق موافق موافق

ويالا بااااااااااي

---

شكرا اخت هيث ..اسف اخ هيثم

ويارب ترجع للبوي فريند بتاعك تاني

.....

....

والان نروح للمواطن الفقران الجربان المعفن الرابع

اسم حضرتك ايه ؟ -

هريدي جعيضي جعضيد بسطويسي

ايه رايك حضرتك في التعديلات الدستورية ؟؟

هريدي يرد بانفعال

عليا الطلاج بالتلاتة دي ولية واطية

بجا الست تعديلات ديات اللي روحت حداها امبارح

ومرضتش ترجعلي الخمشتاشر جنيييه اللي سالفاهم مني

قطعت وقطعت سيريتها

-

لا حضرتك انا قصدي -

التعديلات الدستورية اللي عملها الرئيس مبارك

ـ

هريدي يبيرتعش كأن عنده جفاف

عليا الطلاج بالتلاتة دي ولية طيبة وست الكل واميرة -

ده حتى انا سالف مينها طمنطاشر الف جنيه

وهربان منيها لحد دلوجيت

وهيا مكلمتنيش ولا جالتلي ايتها حاجة واااصل

ويابيه عليا الطلاج بالتلاتة اني غلبااااااااان

شكرا اخ هريدي وعوجبال عنديكو يارب

......

....

نروح لمواطن من المواطنين الحلوين المسمسمين

ونسألهم

اسم حضرتك ايه

معاك الشاب الكول مايكل بيتر سيمون -

ايه رأي حضرتك في التعديلات الدستورية ؟؟

واااااااو ...قصدك على النيولوك اللي هيعملوه للدستور ؟؟ -

ده لوووك جااااامد كيييييييك يا مان

بجد فانتاستيك

واجمد من لوك تامر حسني الجديد

فيري نايتي يا مان

يعني حضرتك موافق على التعديلات دي يا مان ؟؟

اوف كورس يا مان ..انا شاب فانكي اشطة كوول بييس يا مان -

ولازم اوافق طبعا على النيو لوك الجديد للدستور

عشان هيخليه دستور كووووول

وانا بحب الكول

والشاب النايتي لازم يحب النايتي

شكرا يا فانكي باشا

ربنا يكتر من امثالك يارب

..

...

مع السلامو عليكو

....

شوية جد كدا

فيديوهات تزوير الاستفتاء

فيديوهات فضيحة بجلاااااجل

صوت وصورة

اتفرج يا سلام

شكرا لكل انسان عمل اللي عليه

وراح وقال لأ

ومنع المزورين انهم يزورو صوته

وشكرا خاص لكل مصري قعد في بيته

وساب المزورين يزورو صوته

.....

احدى لجان بلقاس في الدقهلية

مدرسة شها الابتدائية



عميد الكلية بيقولهم روحو وقول نعمين

يا ترى في فايدة ؟؟؟

يا جماعة معلش ياريت تسامحوني

قرار قفل المدونة جه بسبب ظروف نفسية كانت جاتلي

وبجد حسيت باحاسيس كتيرة جدا

وقررت قرارات كتيرة جدا جدا

ومعظمها للاسف معرفتش انفذها

ومش عارف لحد دلوقتي قرار قفل المدونة كان صح ولا غلط

بس سيبوكم من كل ده

المهم يا جماعة

باقي اربع ايام بس

اربع ايام

ويحصل تعديل الدستور

يا جماعة

عار علينا

مش كل مرة نتضرب على قفانا ونقول كماون

يا جماعة ياريت بجد نتحرك

يا جماعة ياريت منقاطعش التعديل ده

هتقولي : مهم كدا كدا هيزوروها

هقولك مهو برضه لو حضرتك قاطعت هيزوروها

لكن لما تروح وتقول لأ

وغيرك وغيرك وغيرك يقولو لأ

عمرهم ما يقدرو يزورو ارادة الناس دي كلها

وكلكم شفتو في مجلس الشعب

لما الشعب قدر يعمل حاجة و قدم مرشحي الاخوان المسلمين والمعارضة للبرلمان

يا جماعة

يا مصريين

ياريت منقعدش في بيوتنا يوم الاستفتاء

ونقعد نلطم على خيبنا المتلتلة

ونقول يا ريت اللي جرى ما كان

يا جماعة قولو لأ ابوس ايديكم

احزاب المعارضة اللي بتقولك مقاطعة للاستفتاء **

هيا اول ناس بتطبخ مع الحكومة تحت الطرابيزة لتمرير التعديلات دي

يا جماعة دي اخر فرصة عشان نحس بكرامتنا في البلد دي

اعمل اللي عليك

والباقي على الله

يا مصري

يا عم الحج

ابوس ايدك

متاخدش على قفاك وتقول كماون

يا جماعة ياريت مكونش بدن في مالطة

يا جدعان

اديكم شفتم لما قاطعنا استفتاء 76

اديهم عملو المادة ونجح حسني مبارك

المرة دي مش حسني مبارك اللي هينجح

حسني مبارك هيموت غصب عنه وعن اللي يتشددله

المرة دي جمال مبارك هيركبنا ويدلدل رجليه

وده معناه ان البلد هتروح في داهية

ده اذا مكنتش راحت اساسا

يا جماعة ابوس ايديكم

اي حد فيكم يكسر حاجز الخوف اللي جواه

ويقول لكل اللي يعرفهم يروحو يوم الاستفتاء ويقولو لأ

ابوس ايديكم

يا جماعة

كلكم عارفين التعديلات دي يعني ايه

وممكن احنا نكون قادرين نتكلم دلوقتي

بكرة الله اعلم ايه اللي هيحصل

يا جماعة

ياريت نتحرك

ياريت

يا جماعة

ياريت تحسسونا ان لسه في امل

لسه في امل اننا نتغير

لم تزل تهتف بالحق الحناجر ...لم تزل تصدح بالصدق المنابر

هكذا شعب بلادي لم يزل في .. صفحة التاريخ محمود المأثر

أيها المفسد إنا لا نوالي .. أو نولي سدة الأمر مكابر

ابعد الاموال عنا ليس فينا ... مرتش يرغب في بيع الضمائر

صدقوني بيننا جمع تخفى ...فاحذرو طعنة افاك وغادر **

ينشد الاصلاح في ثوب شريف ..ثم يرمي سمه خلف الستائر

يا بلادي ها هنا اليوم رجال ...ونساء لا يهابون المخاطر

وشباب شمرو الساعد حتى ...ينجلي الافساد عنا ويغادر

..

يارب يكون عندك حق يا محمد الحسيان

ياريت يا جماعة نقول لأ

عشان خاطر مصر

هوا مبارك ده تبع مين بالظبط ؟؟

مبارك يمنح قائد الجيش الأمريكي بالعراق وساما مصريا

2/19/2007

القاهرة -

منح الرئيس حسني مبارك رئيس الجمهورية

القائد الأعلي للقوات المسلحة وسام الاستحقاق من الطبقة الأولي

للفريق أول جون أبي زيد قائد القيادة المركزية الأمريكية تقديرالمجهوداته في دفع علاقات التعاون العسكري المصري الأمريكي

بمناسبة إحالته للتقاعد وذلك أثناء زيارته لمصر الأحد

وقد أناب الرئيس المشير حسين طنطاوي القائد العام للقوات المسلحة وزير الدفاع والإنتاج الحربي

في تقليده الوسام

، حسبما ذكرت جريدة الأهرام

..

الخبر قرأته في مدونة ابن ناصر

سألت نفسي سؤال بسيط

مبارك معانا ولا مع اسرائيل ؟؟

لا بجد مش بهزر ؟؟

..

شخص مجرم حرب .. جزار .. ارهابي

قاتل

خان بلده الاصلي و خان اصله العربي

يديه ملوثة بدماء 650 الف قتيل من ابناء العراق

مبارك يمنحه وسام الاستحقاق من الدرجة الاولى

وهو اعلى وسام عسكري مصري

بامارة ايه ؟؟

هو مبارك ده ريس مين بالظبط ؟؟

بجد والله

ارجع شهر لورا

وتصريح مبارك في حديث لجريدة يديعوت احرانوت الصهيونية

::

أولمرت شخص طيب وعندما أقول أنه طيب فأنا أعني ذاك وأنا راض عنه

::

وبرضه برجع للصورة دي

..

و التي تظهر وتبين قمة المودة والحب الطاهر النقي

بين الاخ مبارك والاخ الفاضل ايهود اولمرت

سلمت يمناه واتاه الله من حيث لا يحتسب

الريس ده تبعنا ولا تبع مين ؟؟

هوا الانحناء والانبطاح وصل للدرجة دي ؟؟

بجد والله

بقينا خلاص مفرش للدول التانية ؟؟

الموالسة علنية للدرجة دي ؟؟

بس هقول ايه

لا قول فوق قول الله تعالى

{وَمَن يَتَوَلَّهُم مِّنكُمْ فَإِنَّهُ مِنْهُمْ إِنَّ اللّهَ لاَ يَهْدِي الْقَوْمَ الظَّالِمِينَ}

...

رئيسنا الهمام .. الجامد التمام

الرئيس اللامع ذو اللون الفاقع و الشعر الطويل و الكرش الكبير

برضه اصدر الاوامر باحالة كوادر وقيادات جماعة الاخوان المسلمين

الى محاكمات عسكرية ..و نهب اموالهم

رغم ان في برنامج مبارك الانتخابي

نص على حاجتين مهمين جدا

اولهما الغاء العمل بقانون الطوارئ

وثانيهما ارساء حق المواطن في محاكمته امام قاضيه الطبيعي

والاتنين كالعادة الريس لحس كلامه فيهم

وبالمناسبة دي بهدي تحياتي لاي انسان ساق العبط و صدق الاعلام الحكومي ايام مهزلة الانتخابات

وراح ادى صوته لحسني مبارك

وبقوله تستاهل

ومع كامل احترامي ليك

شوف اخرة هبلك وعبطك

..

طب اقول ايه بس

بجد اقول ايه ؟؟

ابوس ايديكم قولولي اقول ايه ؟؟

بذمتك مش حاجة تخنق يا جدع ؟؟

بالمناسبة دي بهدي تحياتي للاخ المنافق حامد موسى

صاحب اليافطة الكوالالمبورية دي

وبقوله كلو سنة وانت موالس

الله يحرقك انتا وامثالك

مليتو البلد