كريم عبد الجبار

زمان ... وانا صغنن

وانا في خامسة ابتدائي

مدرس التربية الرياضية في المدرسة المنصورية الابتدائية النموذجية في جدة

اقترح عليا اني أكٌون فرقة كرة سلة نخش بيها في دوري كرة السلة على مستوى المدرسة

مكنتش بحب العب كورة قدم .. بس السلة كنت بحب العبها بس مش كتير اوي

المهم ... عملت الفرقة والاشتراك كان بريالين

ودخلنا الدوري

وبدعنا وعملنا هوايل والله

انا حبيت كرة السلة اوي اوي .. كنت بدخل كرة ثلاثية من نص الملعب

اي والله انا مش بخرف ... المهم فرقتنا عملت شغل حلو

واتأهلنا للنهائي

في المباراة النهائية لاعبنا فريق كل اللي فيه عمالقة ..

معظمهم كانو راسبين عايدين السنة او اكتر

فاجسامهم كانت بسم الله ماشاء الله

اتغلبنا في الماتش ده

بس برضه خدنا المركز التاني واتكرمنا

...

دلوقتي .. ايه لازمة كل الرغي ده

اول امبارح قاعد قدام التليفزيون بتفرج على قناة

animal planet

كانت بتعرض برنامج ترفيهي عن الحيوانات

في وسط البرنامج اتنطق اسم

رجعني لورا اوي اوي اوي

انا قلت انا سمعت الاسم ده فيييين ؟؟

لحد ما الذاكرة رجعت بيا لايام خامسة ابتدائي وكرة السلة اللي ملعبتهاش بعدها خالص

الاسم اللي اتقال هو كريم عبد الجبار

اييييوة ... كـريـم عبد الجبار

طبعا انا زي اي شاب مصري دلوقتي

مخي صدا وذاكرتي بقت في البتنجان

فمعظم المعلومات اللي كنت فاكرها عن كريم عبد الجبار قليلة جدا جدا

قلت لازم اعرف عشان استرجع الذكريات :]

واديني استرجعت

ياريت تعرفو مين هوا

لاعب كرة السلة الامريكي

كريم عبد الجبار

الفنانان

سعد وعبد الرحمن عملو مدونة

بعد ما زهقوني

كل ما يشوفوني

ازاي طريقة عمل المدونة

ازاي طريقة مش عارف ايه

سعد وعبد الرحمن يا جماعة دول توأم

انا لحد دلوقتي بغلط في اساميهم

بقول لسعد يا عبد الرحمن

ولعبد الرحمن يا سعد

ربنا يخلييهم يارب

من اشبال حي الجامعة ونفسي ابقا زيهم والله

اه والله

سعد وعبد الرحمن فنانين بجد

رغم سنهم الصغير

لكن فنانين بجد

مش هطول عليكم

ده لينك مدونة سعد وعبد الرحمن التوأمان

طريقة عمل كباية شاي

لاول مرة وحصريا

طريقة عمل كباية شاي تعدل الدماغ وتروق المزاج

اولا المكونات

- ملعقة من شاي ليبتون او العروسة .. او باكت شاي لو حضرتك بتشرب شاي فتلة

- ملعقتين سكر او تلاتة ..على حسب مزاج حضرتك

- عود من النعناع الاخضر الطري .. ده على حسب المزاج برضه

طريقة التحضير

- توضع معلقة الشاي في كباية فاضية ونظيفة .. ونفس الشيء بالنسبة لباكت الشاي الفتلة

- ويوضع العدد المطلوب من معالق السكر او النعناع على حسب المزاج

- يتم وضع الماء المغلي على الخليط ويتم التقليب جيدا

يشرب الشاي ساخنا او يترك حتى تقل درجة حرارته قليلا

وبالهناء والشفاء

اللهم اني مش علماني

بعيدا عن النقاشات السفسطائية عن العلمانية ونشأتها وفائدتها وحلاوتها

هدخل في الموضوع علطول

الاستاذ الكاتب الكبير العظيم الصحفي حمدي رزق ذكر في مقالة له في اخبار اليوم يوم السبت الماضي

التي جائت تحت عنوان ((هل ابو جهل كان علمانيا )) والله عنوان المقالة كده

المهم الاستاذ حمدي كان بيدافع عن وجهة نظره في العلمانية بطريقته الخاصة

وفي وسط الكلام قال جملة فظيعة هيا ان الاغلبية الساحقة من المدونين علمانية تماما ؟؟

اه وربنا حمدي رزق قال كده

الاغلبية الساحقة من المدونين علمانية تماما

اموت واعرف الاستاذ حمدي رزق بيتكلم عن انهي اغلبية

او انهو مدونين ؟؟؟

انا حبيت اعمل استطلاع رأي في المدونة لمعشر المدونين اسألهم فيه ؟؟

هوا انتم علمانيين ؟؟

عشان نعرف مصداقية الاستاذ العلامة حمدي رزق

وعلى فكرة يا استاذ حمدي

بما انك عارف المدونات وبتشوفها وممكن تشوف المدونة دي في اي وقت

فبحب اقولك اني مش اخوان والله العظيم ..عشان بس متجهزش السكاكين وتقول

اقتلو هذا الاخواني الفاجر عدو العلمانية

ولا انا ارهابي متشدد متطرف رجعي متزمت ارهابي وهابي

اي ورب الكعبة

انا بس مش مقتنع بالعلمانية خالص

بس خلاص

بس حبيت اعرف هل فعلا الاغلبية الساحقة من المدونين علمانية تماما

ياريت تشاركونا يا اخواننا

هتلاقو الاستفتاء في السايد بار على الشمال

صوت وقول هل انتا مدون علماني ولا لأ ؟؟

مستني تعاونكم

يا قلبي لم نفسك

قالولي : عامل ايه ؟؟

قلتلهم عايش

وشعري هايش

ولابس كاب

ـــــــــــ

قاعد لوحدي

بكلم نفسي

لا ليا قرايب

ولا حبايب

ولا اصحاب

ــــــــــــ

باكل عيش

وطبق فول

الطعم ممل

والمنظر يشل

امتى ياربي

هاكل كباب

ــــــــــــ

وقاعد بدندن

باغني وافنفن

اغاني جامدة

لحسني و دياب

ـــــــــــــ

لميت الدبان

وصحيت الغربان

وجننت النسوان

وهبلت الكلاب

ـــــــــــــ

اه يا قلبي يا قاسي

يا شايل وناسي

وقافل بيبانك

متفتح الباب

ــــــــــــ

عشان الحلو يخش

والعب تحت الدش

ولغلي افش

واعيش الشباب

ـــــــــــ

اه اه اه

يا حلو ياللي الشعر سايح عالقفا

تعالى يا حلو اقولك كلمتين في الدفا

يا حبشتكة يا حبشتكة

القلب من حبه اشتكى

متحن عليا يا حبي

وضيع ايام العذاب

ــــــــــ

دبور الحب قرصني

وجرحني وعملي واوا

ومن يومها اتهبلت

وبغني كوكو واوا

وبمشي في الشارع أهبـٍل

وساعات بقوم أطبل

ولأي بنت أسبل

مع اني طول × عرض

وشبه اللبلاب

ــــــــــــ

ادي الحب وادي سنينه

واللي زيي الله يعينه

في حظه منحوس

وفي مخه ملحوس

وفي جيبه مفيش فلوس

وحالته هباب

ـــــــــ

أه يــا أنــــا

الكذب مالوش رجلين

ـــــ

دعوة لزيارة مدونة

مع كاريكاشنجي
مش هتقدر تغمض عينيك

من ريحة صوابع رجليك

هبل في الجبل

ياااه

ايام غريبة وعجيبة يا ناس

فاكرين ايام زمان ؟؟

ايام سعد زغلول باشا عرابي ؟؟

ياااااه

كانت ايام

فاكرين لما انا كنت واقف في الصف الاول في المظاهرة

كنت بالامارة ماسك الحمارة بتاعة احمد عرابي

وبقول معاه

لقد ولدتنا امهاتنا احرارا

..

المهم

امبارح بلليل في ساعة تجلي وانا قاعد كده قلت اا اطلع فوق السطح اشم هوا

طلعت

وملقتش هوا اشمه فقلت اما اروح ادور على هوا كده

لسه جاي ادور على هوا

ابص الاقي الدنيا اتقلبت .والحتة منورة عالاخر

وفي جسم فضائي غريب نازل من السما ووقف فوق سطح بيتنا بييجي عشرة متر

وعمل شعاع على الارض

وقام نازل من الشعاع ده كائن فسفطائي لونه فحلقي له عينين وزمارتين

ولقيته جاي عليا وانا مرعوب وبيقول لي

: تيرا تيرا توم توم بطيخة بطيخة

قلت الراجل نفسه في بطيخ ولا ايه

لقيته قلب فجأة

وبيقولي :

اوه ..انتا تتكلم العربية يا سيدي

لم اكن اعرف ذلك

رديت عليه وقلتله عربية مين يا حج

انتا مين وعايز ايه

المهمة

الكائن ده نزل معايا للشقة وعزمته على واحد شاي

وحكالي انه كان تايه في فضاء المجرة بالطبق الطائر بتاعه

وانه قرر ينزل يمون من كوكب الارض

وجه على البلد الغريبة دي

قالي البلد دي اسمها ايه

قلتله مصر

قالي بس بلد جامدة

وقعد يحكيلي انه من مجرة شنخفانوزنوز

وان ازاي هما متقديمن عننا

((طبعا ))

وهناك بيدهنو الهوا دوكو ..ويخرمو النص جنيه

المهم قلتله

يا عم الحج متيجي نطلع تاني للسطح

واحنا طالعين عالسلم

ابص الاقي قط كبير بيجري ورا فار صغير

والكائن الفضائي اتجنن وجرى وراهم

وجريت وراهم انا كمان بالمرة

نزلنا الشارع

الاقيلك مظاهرة ماشية في الشارع

: يسقط الاستقلال

تحيا بريطانيا العظمى

يا سعد دوس دوس ..احنا معاك من غير فلوس

والعساكر المصريين بيضربو المظاهرة بالنار

والناس جريت من اول رصاصة

انا قلت اما افلسع يا عم الحج

جريت على عربية جاكوار في الشارع فتحتها وركبتها

ومشيت بسرعة 300

وانا على طريق اسكندرية وقفني الكمين

والعسكري بيقلي رخصك يا بيه

انا طبا ممعايش رخص

نزلت من العربية ومسكت الرشاش بتاعي

ونزلت ضرب نار في كل الكمين

كلهم ماتو من اول ثانيتين

اول عسكري جيت اضربه رصاصة في كتفه اليمين

قام مسك كتفه الشمال وقال

اااااااايييييي

وقام واقع ميت

طبعا جريت من الكمين

والعسكري رجع صحى تاني بقوة العصاية السحرية

وقام يجري ورايا

.وانا اجري

وهوا يجري

.وانا اجري
وهوا يجري

اووووووووبس

فجاة اتكعبل على وشي واقع

والعسكري يكاد يقترب مني

قمت اتقلبت وانا على الارض

وبصيت للعسكري وهوا بيجري عليا وهوا ماسك عمود النور في ايده

وجاي باقصى قوته على نافوخي

اووبس

غمضت عينيا

طاااااااخ

الله يرحمك يا علي

انا قلت خلاص مت

فتحت عينيا

ابص الاقي سوبر مان البطل جه وانقذني في اخر لحظة

هوا كان بيصيف في الساحل الشمالي

وشافني لما كان بيتفسح مع مراته السوبر مانة فوق السحاب

المهم قمت اشكر السوبر مان

ولسه جاي امدله ايدي

لقيته قام طاير وطلع يتخانق مع الرجل الاخضر فوق العمارة

قلت اما اخلع انا بقا

بمشي بمشي بمشي

الاقي حاجات بتمشي على رجلي

ابص عليها

!!!

ايه ده

مش معقول

هوا انتو

..

..

الاقي بينكي وبرين كانو تايهين في الصحرا وما صدقو لقوني

بينكي وبرين يا جماعة بتوع الكارتون

برين قالي

كيف حالك يا علي ؟

قلتله الحمد لله

انتا جاس تعمل ايه في مصر يا معلم ؟؟

قالي

مثل كل مرة ..احاول السيطرة على العالم

قلتله يا عم روح نام

انتا جاي مصر عشان تسيطر على العالم

انتا اخرك تسيطر على صوابعك

فبص لبينكي وقاله ايه

...

هل تفكر فيما افكر فيه يا بنكي ؟؟

بينكي رد عليه وقاله

نعم اظن ذلك .. هل تريدني ان احضر لك السكاكر ؟؟

برين ولع وشد في شعر شنب

: هل انت احمق يا بينكي .

قمت داخل في الحوار

وقتله

ايه يا عم بينكي مالك

سكاكر ايه يا عم

شوية وتقولي هل اديت فروضك المنزلية

لقيتهم الاتنين بيبصولي نظرة لولبية

وفجأة خدو الشمسية وطارو

ليييييه بقا

اتاري طائر الرخ كان بيحلق فووووق

وشافنا

وحط عينه عليا بقا

ونزل عليا هوووووووب

وخطفني بين رجليه

وقايم طاير طاير طاير

لحد ما وصل للبنان

ووقعني في بحيرة كبيرة

طلعت منها ونشفت هدومي

ومشيت في لبنان وقابلت اسماعيل ياسين

وقعدت اهزر معاه شوية

شوية والاقي مين داخل علينا

أنا جعان

لا وايه ياريته داخل عادي

لاااا

داخل يجعر ويقولك انا جعاااااااااااان

عايز ااااااااااااااكل

اسماعيل ياسين هداه شوية وقاله خلاص يا اسلام اهدى الاكل جاي اهو

التليفون رن

اسماعيل يسين رد لقا مين يا خواتي ؟؟

ميمو قعدت تصوتله في التلفون

وقالتله العيال بتوع هندسة مطلعين عيني

ويخربيت المهندسن على اللي عايزين يتهندسو

فجأة سمعنا صويت في الشارع

قال ايه

عبد الرحمن عياش بيتخانق مع سواق تاكسي رخم

عبدو بيقوله هما سبع تلاف جنيه بس

والسواق عايز 9 تلاف

المهم وحنا بنبص عالخناقة باب الاوضة اتفتح

ونلاقي مين داخل ...واد صغنن كده عامل دوشة وبنت بتجري ورااه

وبتقول الواد ده هيجنني ..هيجنني اتاريها الحجة اروى الطويل

فجأة لقينا البيت بيتهز والناس بتصوت وتقول البيت هيقع

قمت نازل جري واخد الميكروباص لبيتنا

الميكروباص كان مشغل اغنية الخيار

قالو المانجة والاناناس

مالو الفجل مالو القلقاس ؟؟

والعنب بقا فايف ستار

طب انا بقا هغني الخيار

الخيار الخيار الخيار

اخضر...سلطة ...مخلل

المهم ببص للراجل اللي قاعد جنبي

اتاريه مييييييييين ؟؟

عمنا عماد بعرور

قالي يا علي يابني

ايوة قالي كده

قالي يا علي يابني خد الكيس ده ووصله لعمك الحج السيد الاهبل اللي ساكن قدامكم

طبعا عشان انا شرير

قمت اخدت الكيس لنفسي

وبصيت فيه

الاقي صرة من الدراهم والدنانير

خدتهم واشتريت بيهم عربية

وركبتها ورحت امتحن فيها

اسيبكم بقا عشان ورايا امتحانات

اعفن يوم في تاريخ البشرية

من بين أستار الليل‏..‏ يطلع الفجر‏..‏

ومن بين حجب الغيام‏..‏ تشرق الشمس‏.

.‏ ومن قلب الشدائد والمحن‏..‏ يولد الأبطال العظام‏

ومن ورا باب الحمام ..تجري الصراصير والفيران

...

اليوم هوا اسعد واجمل واظرف والطف ايام حياتي

حقيقة ..لا اجد من الكلام لاقوله في تلك المناسبة السعيدة المجيدة

ربااااااااااه ؟؟

والله تترقرق عيناي ... وتزرفان الدموع كما يزرف الشاب صديقه على قفاه

يالله .. ما هذه الاحاسيس والمشاعير التي احس بها ؟؟

مش قاااااادر امسك نفسي

مش قاااااااااادر

ولازم اعترفلكم

نعم ايها الاخوة الافاضل والاخوات الفاضلات

نعم

نعم

نعم كمان مرة

ان اليوم من الايام الفاصلة في تاريخ البشرية المهول المليئ بالصراعات والبريصات

اليوم هوا عيدنا

بل انه يوم عيدنا

والله انه يوم عيدنااااااا

سيبني يا جدع منك ليه

انهووووووووو يوم عيدنااااااا

والله العظيم يومووووو عيدناااااا

بل عيد للبشرية جمعاء

يا للهول ..يا للهول

انه يوم ليس كبقية الايام

انه يوم ميلاد رئيسنا وحبيبنا وزعيمنا وتاج راسنا وقرة عيننا

فخامة جلالة عظمة جناب غبطة الزعيم القائد المناضل

مبارك

فاليوم يوم مبارك

والعيد عيد مبارك

فكلنا مبارك وكلكم غصب عن اللي جايبنكم مبارك برضه

انه عيد ميلاده

فلنغني له

فلنغني له

هيا فلنغني له

ولا اقولكم ...

فلنغني له

يالا حالان بالان بالان ...هنو ابو الفساد

حيث عيد ميلاده الليلة اوسخ الاعياد

طب هنو ابو الفساد

هييييييييييييه

وادي كمان تهنئة للريس

اشطة

مظبتكم اهو

.........

عدت سنة يا ريس

عدت علينا بالتمام

سنة سعيدة عليك يا ريس

بس ليه عندك كلام

عايزين نشوف ياريس فرحة من غير دموع

أصل شعبك يا ريس من الهم بقى موجوع

كل حاجة يئست معانا أحلامنا ويا صبانا

و اللي عايش معانا

أحزان في الضلوع

شبعنا خلاص يا ريس

شبعنا منك كلام

سنين عدت يا ريس

و أحنا في نفس المكان

إيران قالتها لأ

للعالم مافيش ممنوع

من حقنا نصنع نووي

و في بلادنا يكون موجود

و ليه لأ مش معانا

و كل كلامنا بقى مرفوض

شوف خسرنا قد آيه يا ريس

و بقينا دولة ملهاش وجود

مونديال الفين و عشرة طلعنا من غير أي صوت

دي فضيحة ليك ياريس

و سياستك ما ليها صوت

بتمنى و ياريت يا ياريس

تخلي للظلم حدود

لا فلوسنا تطلع برا

و لا بالأهمال نموت

...

واخر كلامنا

ان ..

..
ياريسنا

معاك بجد كان قلبى طيب

ما قولتش أنا غير حاضر وطيب

وأنت غاوى وعود فى الهوا....

كل سنة بئة وأنت طيب

؛؛ الــخــابـــور ؛؛ في تعديل الدستور

الحزب الوطني

!! عالجزمة

............

انساتي سيداتي اخواتي الفاضلات

كل سنة وانتو متدسطرين

وكل دسطور ودسعجل وانتو طيبين

وعلى رأي اخونا هريدي راعي القهوة الهريدية

!! واركب الدستووووووور .... ..وادستر ..درجن درجن !!

...

.

..

والان نلتقي ببعض الاخوة المواطنين المعفنين

لنسألهم عن رايهم في التعديلات الدستورية

واول جربان معانا

اسم حضرتك ايه ؟

برعي محمد جرجس -

ايه راي حضرتك في التعديلات الدستورية

الاخ برعي يجيب عن السؤال كأنه شايف وحش بري قدامه

بص يا بيه والله العظيم تلاتة -

والله حضرتك انا معرف حاجة عن الموضوع ده

انا لسه جديد في المنطقة هنا

...

..

نروح للمواطن المعفن التاني

اسم حضرتك ايه ؟؟-

ابو كلبة سليم ابن المخلخل

ايه راي حضرتك في التعديلات الدستورية -

ابو كلبة ينتفض من مكانه ويقول باعلى صوت عنده

هوا اللي نعرفه حضرتك هوا ان الريس عشرة على عشرة -

بس

هوا الريس حسني مبارك

هوا مية مية ..واللي بيقولو مية مية

والكبدة صح الصح من طرف اخوكم اللمبي

..

...

نروح للمواطن الجربان الثالث

اسم حضرتك ايه ؟؟

هيثم سامية عنايات ام السعد -

ايه راي حضرتك في التعديلات الدستورية -

حضرتشك التشعديلات دي جامدة مووووووووت

لذيذة تووووو ماتش

تخيل حضرتشك وانا واقف مع البوي فريند بتاعي

وبنتشكلم في الموضوع ده

لقيته معترض وبيقول انه مش موافق على التشعديلات دي

تخيل حضرتك

- الاخ هيثم بيعيط وهوا بيقول الجملة دي -

قولتشله لأأ

الا التشعديلاااات

لحد كده وتقف عند حدودك

احنا لازم نسيب بعض

يعني تخيل حضرتشك سبت البوي فريند بتاعي عشان خاطر طنط تعديلات

وانا موافق موافق موافق

ويالا بااااااااااي

---

شكرا اخت هيث ..اسف اخ هيثم

ويارب ترجع للبوي فريند بتاعك تاني

.....

....

والان نروح للمواطن الفقران الجربان المعفن الرابع

اسم حضرتك ايه ؟ -

هريدي جعيضي جعضيد بسطويسي

ايه رايك حضرتك في التعديلات الدستورية ؟؟

هريدي يرد بانفعال

عليا الطلاج بالتلاتة دي ولية واطية

بجا الست تعديلات ديات اللي روحت حداها امبارح

ومرضتش ترجعلي الخمشتاشر جنيييه اللي سالفاهم مني

قطعت وقطعت سيريتها

-

لا حضرتك انا قصدي -

التعديلات الدستورية اللي عملها الرئيس مبارك

ـ

هريدي يبيرتعش كأن عنده جفاف

عليا الطلاج بالتلاتة دي ولية طيبة وست الكل واميرة -

ده حتى انا سالف مينها طمنطاشر الف جنيه

وهربان منيها لحد دلوجيت

وهيا مكلمتنيش ولا جالتلي ايتها حاجة واااصل

ويابيه عليا الطلاج بالتلاتة اني غلبااااااااان

شكرا اخ هريدي وعوجبال عنديكو يارب

......

....

نروح لمواطن من المواطنين الحلوين المسمسمين

ونسألهم

اسم حضرتك ايه

معاك الشاب الكول مايكل بيتر سيمون -

ايه رأي حضرتك في التعديلات الدستورية ؟؟

واااااااو ...قصدك على النيولوك اللي هيعملوه للدستور ؟؟ -

ده لوووك جااااامد كيييييييك يا مان

بجد فانتاستيك

واجمد من لوك تامر حسني الجديد

فيري نايتي يا مان

يعني حضرتك موافق على التعديلات دي يا مان ؟؟

اوف كورس يا مان ..انا شاب فانكي اشطة كوول بييس يا مان -

ولازم اوافق طبعا على النيو لوك الجديد للدستور

عشان هيخليه دستور كووووول

وانا بحب الكول

والشاب النايتي لازم يحب النايتي

شكرا يا فانكي باشا

ربنا يكتر من امثالك يارب

..

...

مع السلامو عليكو

....

شوية جد كدا

فيديوهات تزوير الاستفتاء

فيديوهات فضيحة بجلاااااجل

صوت وصورة

اتفرج يا سلام

شكرا لكل انسان عمل اللي عليه

وراح وقال لأ

ومنع المزورين انهم يزورو صوته

وشكرا خاص لكل مصري قعد في بيته

وساب المزورين يزورو صوته

.....

احدى لجان بلقاس في الدقهلية

مدرسة شها الابتدائية



عميد الكلية بيقولهم روحو وقول نعمين

منكم واليكم ...والسلام عليكم

مدونة إحَترِف تـَصمِيم المُدونَات

مدونة اشارك فيها مع محمد مجدي صاحب مدونة كــوبــا

نحاول فيها تقديم المساعدة للمدونين في تصميم المدونات

بشرح بسيط ومفصل كل فرد فينا على حسب مقدرته

اي مدون يريد الاستفسار عن اي شيء متعلق بتصميم المدونة

فليتفضل بترك تعليق فيها يقول فيه ما يريد معرفته

وبإذن الله سوف نعمل على الرد عليه في اسرع وقت ممكن

والله من وراء القصد

...........

مدونة

C@RiCA -ShaNgy

مدونة كاريكاتير اشارك فيها مع شاب فقر

شاب لطيف خفيف الظل والدم

تحس بالمتعة وانت تتحدث اليه

المدونة ستكون عبارة عن كاريكاتيرات من افكاره

ورسوماتي انا

انا لست رساما للكاريكاتير

ولم اقرأ في حياتي اي كتاب عن الكاريكاتير

هو مجرد هواية بالنسبة الي

ولكني فكرت في التعبير عن ارائي بواسطة الكاريكاتير

ووجدت اخيرا من يقف بجانبي ويؤيدني في تلك الفكرة

نحن لسنا الوحيدين

ولكننا نختلف عن الاخرين

خااااااااااااااالص

انتظرونا

مع واحد من الناس و الشاب الفقر و كوبا

مش هتقدر تغمض عينيك

من ريحة صوابع رجليك

يسمع من بقك ربنا ..يا

هوا الرئيس مبارك هيموت ؟؟

ايه ده

يعني هوا بشر زينا كده

ممكن يموت ؟؟

مش معقول

ابسليوتلي

..

طيب الريس عارف انه هيموت زي بقية البشر كده ؟؟

طب هيقول لربنا ايه ؟؟

..

الله اعلم

حسابه بينه وبين ربنا

يارب يهديني انا وانتا بس

ونبقى ملتزمين كويس

يعني نبص لنفسنا قبل ما نبص لغيرنا

...

المهم

ازيك يا شباب

ملكوش دعوة بالكلام اللي فوق ده

متاخدوش في بالكم

المهم بقا

انا وانا خارج من جامعة المنصورة اول امبارح

قبل ما اخرج

مشيت جنب مبنى بيتبني

جوه الجامعة

وكان جنبيه الشاهد اللي بيتكتب

قدام اي مشروع بيتعمل

الشاهد ده اللي هوا بيبقى عبارة عن بتاعة رخام محفور عليها

الاسطوانة المعروفة

بتاعة

في عهد السيد الرئيس فلان الفلاني

وفي عهد المحافظ علان العلاني

وفي عهد الوزير سمعان السمعاني

وفي عهد خالتي ام احمد

وهكذا

وفي اخر الشاهد يكتبو

قام السيد اللواء الوزير الدكتور المحافظ

بافتتاح حمام عمومي في هذا الشارع بتكلفة

ستة مليارات جنيه

وكلو في الاونطة

المهم بقا

وانا ماشي جنب المبنى

شفت الشاهد بتاع المبنى ده

ـــــ

ـــ

بس في شاب ربنا يحرسه يارب

كان كاتب تعليق طريف اوي

فوق كلمة

((في عهد السيد الرئيس ))

الاخ ربنا يحميه ويكمله بعقله يارب

كاتب

قبر المرحوم

..

نفسي اعرف مين الشاب ده ؟؟

ـــ

ــ

عشان كده كنت بسأل الاسئلة اللي فوق دي

هل اليوم ده فعلا هييجي ؟؟

وياترى هيبقى عامل ازاي ؟؟؟

ــ

ــ

ده بقا

كاريكاتير بسيط كده

عملته امبارح

صورته بكاميرا الموبايل

مكن تضغط على الصورة للتكبير اذا حبيت

عايز كل واحد

يشوفه ويقولي تعليق مناسب يكون الراجل اللي في الكاريكاتير ده بيقوله

يالا على رأي إنسانة

احسن تعليق هيكسب خمسة وسبعين قرش

وابقو قابلوني