انتبه من فضلك : الكراسي للفرجة فقط..ممنوع الجلوس على الكراسي
سبحان الله
انتا ممكن تشوف مشاهد كتيرة غريبة في حياتك
ممكن تندهش وتبرق وتتنح
وممكن تقول وماله ..بتحصل في احسن العائلات
لكن المشاهد الغريبة دي في مصر ليها وضع خاص جدا
بحيث انك لما تشوفها بتلاقيها عادية جدا جدا والناس عادي خالص ..ولا بيتكلمو ولا بينطقو
مع ان المشاهد دي سبحان الله ...لو شافها اي بني ادم تاني هيبلم وهيتنح هيقول ايه ده ؟؟
اخر المشاهد دي
كان مشهد كرسييين من الكراسي اللي موجودة على الارصفة الموجودة في مصر
بس المرة دي الكرسي عاملين حواليه سلوك شائكة
عشان محدش يقعد عليه !!!
انا قعدت اقول ليه ؟؟
ليه يا جماعة حاطين سلوك شايكة على الكرسي
قلت جايز يكونو لسه داهنينه ولا حاجة
لمسته بايدي ولقيته ناشف انشف من دماغ بلدياتنا لما ييجي يفكر ... ده غير ان منظره اساسا بيقول انه متدهنش من سنة تلاتين قبل الهجرة !!
قعدت اقول ليه ؟؟؟
يا ترى عاملين حواليه كده ليه
على فكرة ممكن ناس متخدش بالها من السلوك عشان الصورة مش موضحاها
ده لينك فيه الصورة بالحجم الكبير وهتتأكد من كلامي لما تشوف
وانا معلم على السلوك في الصورة دي
طبعا انا قعدت افكر كتير
واستغرب كتير جدا زي منتو مستغربين دلوقتي
بس يا جماعة زمان قال الشاعر اللي معرفش اسمه
اذا عرف السبب .....بطل العجب
لذلك مش هتستغربو خالص ليه الكرسي محاوطينه بالسلوك الشايكة
ومش هتستغربو ليه الناس ساكتة ومش بيتكلمو خاااااااالص
لما تعرفو ان الكرسي ده موجود على الرصيف اللي قدام مديرية امن الدقهلية
ومع ذلك نفسي اعرف
كانو حاطين سلوك شائكة حوالين الكرسي ليه
خايفين من ايه ؟؟؟
يعني الكرسي ده خطر على الامن القومي للدرجة دي ؟؟
سبحان الله
الناس هتقعد عليه وهتفجر المديرية يعني ؟؟
طب ما العربيات بتعدي كل يوم بالالوف قدام المديرية
ناقص يمنعو العربيات بقا !!
سبحان الله
بجد بجد انا مش متخيل اخواننا الظباط دول بيفكرو ازاي ؟؟
قولولي وجهة نظركو
