يا ترى في فايدة ؟؟؟
![[la.jpg]](https://blogger.googleusercontent.com/img/b/R29vZ2xl/AVvXsEifND3i63Il_GEe-Hy6eBtRChJzwgdT8q_SjHsXFg618w6YoOu5qIWXom6m04S0r2BRQFVvTGO_frwmM_qozsIo2Z9r76sVLxUuUWTw50GjFPypZmncRfUJMioThmt4hsucOkWE/s1600/la.jpg)
يا جماعة معلش ياريت تسامحوني
قرار قفل المدونة جه بسبب ظروف نفسية كانت جاتلي
وبجد حسيت باحاسيس كتيرة جدا
وقررت قرارات كتيرة جدا جدا
ومعظمها للاسف معرفتش انفذها
ومش عارف لحد دلوقتي قرار قفل المدونة كان صح ولا غلط
بس سيبوكم من كل ده
المهم يا جماعة
باقي اربع ايام بس
اربع ايام
ويحصل تعديل الدستور
يا جماعة
عار علينا
مش كل مرة نتضرب على قفانا ونقول كماون
يا جماعة ياريت بجد نتحرك
يا جماعة ياريت منقاطعش التعديل ده
هتقولي : مهم كدا كدا هيزوروها
هقولك مهو برضه لو حضرتك قاطعت هيزوروها
لكن لما تروح وتقول لأ
وغيرك وغيرك وغيرك يقولو لأ
عمرهم ما يقدرو يزورو ارادة الناس دي كلها
وكلكم شفتو في مجلس الشعب
لما الشعب قدر يعمل حاجة و قدم مرشحي الاخوان المسلمين والمعارضة للبرلمان
يا جماعة
يا مصريين
ياريت منقعدش في بيوتنا يوم الاستفتاء
ونقعد نلطم على خيبنا المتلتلة
ونقول يا ريت اللي جرى ما كان
يا جماعة قولو لأ ابوس ايديكم
احزاب المعارضة اللي بتقولك مقاطعة للاستفتاء **
هيا اول ناس بتطبخ مع الحكومة تحت الطرابيزة لتمرير التعديلات دي
يا جماعة دي اخر فرصة عشان نحس بكرامتنا في البلد دي
اعمل اللي عليك
والباقي على الله
يا مصري
يا عم الحج
ابوس ايدك
متاخدش على قفاك وتقول كماون
يا جماعة ياريت مكونش بدن في مالطة
يا جدعان
اديكم شفتم لما قاطعنا استفتاء 76
اديهم عملو المادة ونجح حسني مبارك
المرة دي مش حسني مبارك اللي هينجح
حسني مبارك هيموت غصب عنه وعن اللي يتشددله
المرة دي جمال مبارك هيركبنا ويدلدل رجليه
وده معناه ان البلد هتروح في داهية
ده اذا مكنتش راحت اساسا
يا جماعة ابوس ايديكم
اي حد فيكم يكسر حاجز الخوف اللي جواه
ويقول لكل اللي يعرفهم يروحو يوم الاستفتاء ويقولو لأ
ابوس ايديكم
يا جماعة
كلكم عارفين التعديلات دي يعني ايه
وممكن احنا نكون قادرين نتكلم دلوقتي
بكرة الله اعلم ايه اللي هيحصل
يا جماعة
ياريت نتحرك
ياريت
يا جماعة
ياريت تحسسونا ان لسه في امل
لسه في امل اننا نتغير
لم تزل تهتف بالحق الحناجر ...لم تزل تصدح بالصدق المنابر
هكذا شعب بلادي لم يزل في .. صفحة التاريخ محمود المأثر
أيها المفسد إنا لا نوالي .. أو نولي سدة الأمر مكابر
ابعد الاموال عنا ليس فينا ... مرتش يرغب في بيع الضمائر
صدقوني بيننا جمع تخفى ...فاحذرو طعنة افاك وغادر **
ينشد الاصلاح في ثوب شريف ..ثم يرمي سمه خلف الستائر
يا بلادي ها هنا اليوم رجال ...ونساء لا يهابون المخاطر
وشباب شمرو الساعد حتى ...ينجلي الافساد عنا ويغادر
..
يارب يكون عندك حق يا محمد الحسيان
ياريت يا جماعة نقول لأ
عشان خاطر مصر
التسميات: انا الشعب
كــتــبــهــا واحـــد مـــــن الـنـــاس | 12:53 ص
50 CoMMeNtS :
آآآه.. وجعتني موت
دي الغربة ملت البيوت
وبقينا في زمن البنكنوت
زمن الأرطاس والزعبوط
وبقينا عرايس خيوط
لكل سافل و حوت
أكرملنا نختار الموت
وعلي الشر ندوس ونفوت
لازم نقولها بعلو الصوت
لا وألف لا للطاغوت
كده كده في الآخر هنموت
أموت راجل ولا أعيش هلفوت
اهو ده الكلام ولا بلاش
الله ينور يا قنديل باشا يا مظبتنا
والله يا واحد من الناس كلامك سليم
بس للاسف انا لسه مطلعتش بطاقه بس بجد ان شاء الله اول ماطلع بطاقه هشارك وهقول وهصوت بالى انا عايزاه والى انا شايفاه صح
لانى مش شايفه ان دا شئ يتخاف منه
كنت بكلم واحده قريبتى فى سنى وكانت بتقولى اوعى تخرجى يوم الاتنين الجاى علشان هيكون فى مظاهرات والكلام دا والشوارع هتكون زحمه وهيقبضو على ناس والكلام الغريب دا
المهم الكلام اخدنا عن المشاركه السياسيه والانتخابات والترشيح والتصويت والكلام دا
قالتلى يابنتى كدا كدا هيزوروهه نوجع دماغنا ليه؟؟ اعدت اقنعهه يمين شمال مفيش فايده ... كنت بدن فى مالطا اساسا
بس بجد الناس الى بتفكر كدا بتكون سلبيه لان لو فى تزوير اظن هيكون اسهل لما محدش يصوت لان كدا هيكون معاهم عدد اصوات كبيره يتحكمو فيهه زى ماهما عايزين
لكن لما نصوت هيكون اصعب التزوير بس مش مستحيل
وكمان لازم نعمل الى علينا لان لو كل واحد عمل الى عليه هنقدر نعمل حاجه ونغير حاجه ومادام الى بنعمله مش غلط يبقى لازم نعمله ونستمر فيه
يارب كل الناس يقتنعو بكلامك يا واحد من الناس ويحاولو يعملو حاجه وميستسهلوش وكفياهم سلبيه
وبجد كلام قنديل رائع جدا
يسلم ايدك يا واحد من الناس وياريت متتوقفش عن التدوين لانك كدا هتكون سلبى واظن انك رافض السلبيه والسلبيين فمينفعش تعمل حاجه اساسا انت رافضهه
بالتوفيق ان شاء الله
يا جدعان ياريت الكل ينشر الموضوع بتاع علي في كل المدونات علشان الناس تاخد بالها و يا علي قرارك غلط في قفل المدونة و سيب احساسيك دي دلوقتي الواحد وهو في فترة ازمات او حاجات زي كدا ممكن بيصدر قرارات ولولا الشديد القوي كنت فتحت مدونتي لكن مش بيدي
انا بقول لا للأستفتاء
كلنا هنقول لا ونعترض ونشجب
وبعدين؟؟؟؟؟؟؟؟؟؟؟
النتيجة معروفة يا علي
لا يوجد عندي امل
الحملان نائمه
والذئاب الجائعه محيطه
http://1minelnas.blogspot.com
معلش اصلي ماليش ف السياسة ... انا داخل بس اقولك شكرا ع الكومنت
باي
مبروووووووووووووووووووك رجوعك ياعلي.
انا فعلا كنت ناويه أعمل البوست ده, وهنزله بكره ان شاء الله.
احنا كلنا لازم نروح نقول لأ ياعلي, انا عن نفسي رايحه ان شاء الله, وتسنيم كمان طبعا, ان شاء الله نقدر نعمل حاجه, لو كلنا روحنا مش هيلاقوا أصوات يزوروها.
ده بجد أخر أمل لينا, وربنا معانا.
مبروك رجوعك ياعلى
مبروك لينا وعلينا
ويوم الاثنيت كلنا هنقول لاء ياعلى
لازم كلنا نروح
لينا فى السياسة او ملناش
لان دى مش سياسة
دى حياتنا
واللى بقى من بلدنا
فرحانه جدا برجوعك ياعلى
ويارب نقدر نعمل حاجة
كلنا
لولو
منور يا علي ..ألف حمدالله ع السلامة
و الله يا علي انت بتفكرني بيوم ماقولت يا جماعة روحوا إعملوا بطاقة إنتخابية
خدت كلام على كلام ..لغاية لما حسسوني باليأس
أنا هاروح يا علي و هاقول لأ
هعمل اللي عليا عشان أبقى خلصت ذمتي قدام ربنا
هما بعد كده يزوروا أو مايزوروش منهم للابنا بأه المهم اني موش هستسلم و أملي في ربنا كبير
الإستفتاء على فكرة موش محتاج بطاقة انتخابية
البطاقة الشخصية كفاية
يا رب الكل يروح لحسن التعديلات دي ..زي وشهم بالظبط
تحياتي
ربنا يكرمك يا على هو ده الكلام الصح .. المقاطعة عجز واستسلام
المقاطعة خيبة مش انتقام
زوروها وقالوا وافقوا
زوروها لما الشعب نام
شعب صاحى يقول بمزاجه لأه
بدل من الوجع غصب عنه يقول اه
...
متقاطعوش يا جدعان مادام كده كده ناويين على التزوير يتزور واحنا برده مش راضيين
هييييييييييييه ايرا جيت يا عم انت كويس دلوقتي يا علي؟؟ وبالنسبه لموضوع ادستور فطبعا نقول لأ وياريت وانا بدعوك وبدعو الجميع يجوا عندي ويوقعوا ضد التعديلات الدستوريه علي وثيقه شعبيه ترفضها
تحياتي لك
رغم اقتناعي التام ان مفيش فايدة
وان الطبخة حتتاكل حتتاكل
فيها سم ولا سكر
لازم ناكلها كان نفسي أروح وأقول لأ
ممكن اسبابي للأ غير اسباب ناس تانية
وممكن نكون كلنا عايزين دستور غير بعض
يعني دستور تفصيل
ولكن لن يرضي الناس الا بالدستور الذي ليس له تبديل ولا تعديل
دستور منزل من فوق سبع سموات
{إِنَّا أَنزَلْنَا التَّوْرَاةَ فِيهَا هُدًى وَنُورٌ يَحْكُمُ بِهَا النَّبِيُّونَ الَّذِينَ أَسْلَمُواْ لِلَّذِينَ هَادُواْ وَالرَّبَّانِيُّونَ وَالأَحْبَارُ بِمَا اسْتُحْفِظُواْ مِن كِتَابِ اللّهِ وَكَانُواْ عَلَيْهِ شُهَدَاء فَلاَ تَخْشَوُاْ النَّاسَ وَاخْشَوْنِ وَلاَ تَشْتَرُواْ بِآيَاتِي ثَمَناً قَلِيلاً وَمَن لَّمْ يَحْكُم بِمَا أَنزَلَ اللّهُ فَأُوْلَـئِكَ هُمُ الْكَافِرُونَ }المائدة44
والتغيير لن يأتي حتي نغير ما بأنفسنا
{لَهُ مُعَقِّبَاتٌ مِّن بَيْنِ يَدَيْهِ وَمِنْ خَلْفِهِ يَحْفَظُونَهُ مِنْ أَمْرِ اللّهِ إِنَّ اللّهَ لاَ يُغَيِّرُ مَا بِقَوْمٍ حَتَّى يُغَيِّرُواْ مَا بِأَنْفُسِهِمْ وَإِذَا أَرَادَ اللّهُ بِقَوْمٍ سُوءاً فَلاَ مَرَدَّ لَهُ وَمَا لَهُم مِّن دُونِهِ مِن وَالٍ }الرعد11
بس علي كل حال كان نفسي برضه اقول ل
ولكني مش موجود
انا من احد المعجبين جدا بمدونتك وبقولك يا ريت متقفلش المدونه لانها من المدونات المفضله عندي.
المقاطعه سلبيه لازم نشارك ونقول رأينا سواء ب اه او لأ
هيزوروا يزوروا احنا عملنا اللي علينا وصدقوني الفرج قريب
اولا ....
حمدلله ع السلامة....
ثانيا.....
انا معاك تماما....
اسمحلى هاخد الصورة التانية دى....
وهانشرها عندى فى المدونة.....
تحياتى
واحد من الناس
افتكر بعد البوست ده المدونة هتتقفل كده كده غصب عنك وكمان بعد يوم الاستفتاء اللى هوا يوم الاتنين
الاتنين بالليل هتلاقى امين شرطة معفن جى يجرجرك على امن الدولة عارف ليه الاتنين بالليل لان نتيجة الاستفتاء هتكون طلعت خلاص ومتقوليش ازاى حكمة ربنا باه ايه ناوى تعترض ولا حاجة
انا عن نفسى هروح واقول لا وانا عارف ان النتيجة كده كده هتتزور لكن اسمى عملت اللى عليا وربنا على الظلم والمفترى
بعد البوست بتاعك وبعد بوستات كتير نزلت ومنها البوست بتاعى هنلاقى امن الدولة لما المدونيين كلهم يالا بالشفا
ميمو علقت عندى وبتقولى لو منزلتش بوست التلات اللى جاى هتعرف انى اتاخدت خلاص تفتكر هيلموا المدونيين كلهم فعلا
ألف ألف مبروك رجوعك لينا ياعلي، ربنا مايفرقنا أبداً ياصاحبي، ده احنا كنا مشتاقين قوي
باهدي الزجل ده لمصر أم الدنيا ولشعبها الطيب
أم المصايب
حزنك ماليني ياست الحبايب
ياللي ترابك ماليان عجايب
يامصر إصحي وفكي اللجام
ده انتي حبيبتي واعز القرايب
ياأمي يامصر ياغالية عليا
إصحي ودوسي برجلك مصايب
حطوا في إديكي السلاسل ياأمي
وانتي حرة برغم المصايب
حافضل ابكي عليكي بدموعي
واندب عليكي ياأمي ندايب
شلة من ولادك حقيقي جبابرة
واخدينك يامصر ياأمي سبايب
بيسبوا في شعبك ومصوا دمه
وخلوا نيلك ونخلك خرايب
ضربوا ولادك وهانوا الجميع
وعبوا كرمك وخيرك زكايب
بيعدلوا الدستور أخيراً ياأمي
عشان ماتكتر فيكي الزرايب
ويجف نيلك وتنشف مزارعك
ويحطوا في كل ركن من أرضك سدايب
عيني عليكي يامصر ياأمي
ياأغلى ماف حياتي برغم المصايب
حمد الله على السلامة
النشيد جامد جدا
مختلف معاك فى الرأى
لو رحت واديت صوتك هتبقى نسبة المشاركة هى هى وهى 82.65% قال 65.21% منهم نعم للتعديلات وللمستقبل الجديد و قال 40 % منهم لا للتعديلات
ونهنىء الشعب المصرى على نتيجة الاستفتاء التى ان دلت على شىء فانما تدل على الزيادة الواضحة فى الانفتاح فى الحياة السياسية والديموقراطية وانخراط الشعب فى صنع القرار السياسى بما له من رؤية لابد وأن يتمتع بها شعب عريق ذو حضارة أصيلة كالشعب المصرى
عموما الاختيار عهدة على المختار وربنا يهدينا أجمعين وصدقنى لو فيه منها فايدة كنا قلنا وعلى فكرة العبد لله كان ايجابى اوى اوى زيك و زي سوسة قبل كدة وانت عارفني يا على -انا شاركت فى الاتحاد الحر واعتقلت وتم استجوابي واتبهدلت لا لشىء الا الايجابية لكن بجد يا على البلد دي رايحة رايحة بغباء الاغبياء دول
المشكلة ان لو احنا نتحرك هيتصلح حاجة..كدة كدة متزورة وكدة كدة اغبياء وهيودونا فى داهية بتزويرهم لارادتنا
ربنا يحرقهم
امين
لا مش هانسى انورك
لأنك بلدياتى
أنا مش عارف ايه الكآبه اللى أنا شايفها دى
انتا ياابنى هاتفرقع
دى مش نهاية العالم
جمال جاى و فى ايديه بزازه للشعب
اكيد هاتنول نصيبك و تسكت
مدونه جميله
أرجو التواصل
مبروك الرجوع
وبرافو عليك إنك مش هتكون سلبي
أحييك
النهارده سألت: إحنا كمغتربين .. لينا إستفتاء ولا لأ؟
عرفت إن مالناش .. لا إحنا نهمهم .. ولا بيعتبروا إن لينا حاجة في البلد دي
وعجبي
حمد لله علي السامه لرجوعك و انا كمان رجعت برضو
مع ان كل البوستات بتتكلم عن التعديلات الدستوريه الا ان غير مقتنع بالحكايه دي من بابها علشان كده مش هروح
وحسبي الله ونعم الوكيل في اللي كان السبب
تحيات
الدبور
لكل ظالم نهاية
و باذن الله النهاية قربت
بس لازم نعمل اللى علينا وناخد بالاسباب
مش عارف أقولك إيه
بس أنا مع المقاطعه من أساسه لأنني غير مقتنع بهذا النظام وكل ما يقوم به من سخافات
أرق تحياتي
حمد لله على السلامه
s89
منورانا اختي الكريمة
وشكرا على كلماتك الجميلة
اللي شجعتني كتير ورفعت من معنوياتي
copa
مبروك يا كوبا رجعوك للتدوين
وكل سنة وانتا طيب
Mohamed A. Ghaffar
رأيك احترمه استاذي الفاضل
كل عام وانت بخير
smraa alnil
الكلام معدش منه فايدة
منورانا يا انجي
واحد من الناس
انا فعلا كنت بتسأئل
لسه في امل
يظهر طلع مفيش
كل سنة وانت طيب يا طارق
مسرح الغلابا
لا شكر على واجب
منورنا ياباشا
مسرح الغلابا
لا شكر على واجب
منورنا ياباشا
esraa
ربنا يكرمك انتي وكل اللي زيك يارب
منورانا يا اسراء
ست المرتفعات
كل سنة وانتي طيبة يا ست المرتفعات
منورة المدونة دايما يارب
soosa el-mafroosa
اهو ده الكلام ولا بلاش
ربنا يكرمك يا سوسة يارب
منورانا
islamz
اهو ده الكلام ياباشا
ربنا يكرمكم كده يارب
دايما واقفين جنبي
اشطة يا سلم
ibn nasser- ابن ناصر
بإذن الله هوقع في العريضة دي ياباشا
منورنا يا كبير
BinO
شكرا لتشريفك مدونتي اخي الكريم
منورنا دايما
usama hamdi
اشكرك اخي الكريم على كلماتك المشجعة لي
ويارب نكون عند حسن الظن دائما
dandana
الصورة من تصميم عبد الرحمن عياش صاحب مدونة الغريب
وحقوق النشر غير محفوظة لاي مصري
يعني براحة راحة راحتك
مصر هى أمى
ربنا يستر يا محمد باشا
على العموم انا نزلت بوست جديد
مش عارف انتا نزلته في ابو زعبل بقا ولا في طرة ؟؟؟
Egyptian Falcon الصقر المصري
ربنا يكرمك ياباشا
بجد الشعر ده رااااائع
منورنا يا كبير
Islamist Bloke
معدش في اي فايدة للكلام خلاص ياباشا
ياريت اللي حصل ما كان
كل سنة وانت طيب يا احمد
sosa
ان شاء الله ساتفاعل معكم اختي الكريمة
في اقرب وقت يكون لدي وقت فراغ
بإذن الله
islam yousef
انا مش بستعمل البزازات بصراحة
ممكن بلابا جمال يوزع علينا بطرق تانية ؟؟
منورنا يا كبير
يا مراكبي
ياباشا كويس انهم فاكرين الناس اللي جوه اساسا
عايزهم يفتكرو اللي بره ؟؟؟
منورنا يا كبير
الدبور
كل الشعب المصري بيقول حسبي الله ونعم الوكيل
انا لله وانا اليه راجعون
Om@r™
صحيح يا عمر
منورنا يا طوييييل
IBN BAHYA
زي ما قلت الكلام معدش له نتيجة
منورنا يا استاذنا الفاضل
بجد شرفت المدونة
ياء
الله يسلمك ياباشا
منورنا
إرسال تعليق
<< Home