الاقصى نادى والندى غالي ...ويهون عشانه العمر لو غالي
وَاحِـــدْ مـِــنْ الـــنــَــــاسْ: فبراير 2007
ايوة انا  .. في حاجة يا عماد ؟
NaMe : Ali Adel
FroM : el ManSoOorRa , Egypt , Agda3 Nas

طالب جامعي حاليا ..عاطــل مستقبلا

ana Meen ba2a ?

الأربعاء، فبراير 28، 2007

هوا مبارك ده تبع مين بالظبط ؟؟

مبارك يمنح قائد الجيش الأمريكي بالعراق وساما مصريا
2/19/2007
القاهرة -
منح الرئيس حسني مبارك رئيس الجمهورية
القائد الأعلي للقوات المسلحة وسام الاستحقاق من الطبقة الأولي
للفريق أول جون أبي زيد قائد القيادة المركزية الأمريكية تقديرالمجهوداته في دفع علاقات التعاون العسكري المصري الأمريكي
بمناسبة إحالته للتقاعد وذلك أثناء زيارته لمصر الأحد
وقد أناب الرئيس المشير حسين طنطاوي القائد العام للقوات المسلحة وزير الدفاع والإنتاج الحربي
في تقليده الوسام
، حسبما ذكرت جريدة الأهرام
..
الخبر قرأته في مدونة ابن ناصر
سألت نفسي سؤال بسيط
مبارك معانا ولا مع اسرائيل ؟؟
لا بجد مش بهزر ؟؟
..
شخص مجرم حرب .. جزار .. ارهابي
قاتل
خان بلده الاصلي و خان اصله العربي
يديه ملوثة بدماء 650 الف قتيل من ابناء العراق
مبارك يمنحه وسام الاستحقاق من الدرجة الاولى
وهو اعلى وسام عسكري مصري
بامارة ايه ؟؟
هو مبارك ده ريس مين بالظبط ؟؟
بجد والله
ارجع شهر لورا
وتصريح مبارك في حديث لجريدة يديعوت احرانوت الصهيونية
::
أولمرت شخص طيب وعندما أقول أنه طيب فأنا أعني ذاك وأنا راض عنه
::
وبرضه برجع للصورة دي
..
و التي تظهر وتبين قمة المودة والحب الطاهر النقي
بين الاخ مبارك والاخ الفاضل ايهود اولمرت
سلمت يمناه واتاه الله من حيث لا يحتسب
الريس ده تبعنا ولا تبع مين ؟؟
هوا الانحناء والانبطاح وصل للدرجة دي ؟؟
بجد والله
بقينا خلاص مفرش للدول التانية ؟؟
الموالسة علنية للدرجة دي ؟؟
بس هقول ايه
لا قول فوق قول الله تعالى
{وَمَن يَتَوَلَّهُم مِّنكُمْ فَإِنَّهُ مِنْهُمْ إِنَّ اللّهَ لاَ يَهْدِي الْقَوْمَ الظَّالِمِينَ}
...
رئيسنا الهمام .. الجامد التمام
الرئيس اللامع ذو اللون الفاقع و الشعر الطويل و الكرش الكبير
برضه اصدر الاوامر باحالة كوادر وقيادات جماعة الاخوان المسلمين
الى محاكمات عسكرية ..و نهب اموالهم
رغم ان في برنامج مبارك الانتخابي
نص على حاجتين مهمين جدا
اولهما الغاء العمل بقانون الطوارئ
وثانيهما ارساء حق المواطن في محاكمته امام قاضيه الطبيعي
والاتنين كالعادة الريس لحس كلامه فيهم
وبالمناسبة دي بهدي تحياتي لاي انسان ساق العبط و صدق الاعلام الحكومي ايام مهزلة الانتخابات
وراح ادى صوته لحسني مبارك
وبقوله تستاهل
ومع كامل احترامي ليك
شوف اخرة هبلك وعبطك
..
طب اقول ايه بس
بجد اقول ايه ؟؟
ابوس ايديكم قولولي اقول ايه ؟؟
بذمتك مش حاجة تخنق يا جدع ؟؟
بالمناسبة دي بهدي تحياتي للاخ المنافق حامد موسى
صاحب اليافطة الكوالالمبورية دي
وبقوله كلو سنة وانت موالس
الله يحرقك انتا وامثالك
مليتو البلد

التسميات: ,

الخميس، فبراير 15، 2007

يسمع من بقك ربنا ..يا

هوا الرئيس مبارك هيموت ؟؟
ايه ده
يعني هوا بشر زينا كده
ممكن يموت ؟؟
مش معقول
ابسليوتلي
..
طيب الريس عارف انه هيموت زي بقية البشر كده ؟؟
طب هيقول لربنا ايه ؟؟
..
الله اعلم
حسابه بينه وبين ربنا
يارب يهديني انا وانتا بس
ونبقى ملتزمين كويس
يعني نبص لنفسنا قبل ما نبص لغيرنا
...
المهم
ازيك يا شباب
ملكوش دعوة بالكلام اللي فوق ده
متاخدوش في بالكم
المهم بقا
انا وانا خارج من جامعة المنصورة اول امبارح
قبل ما اخرج
مشيت جنب مبنى بيتبني
جوه الجامعة
وكان جنبيه الشاهد اللي بيتكتب
قدام اي مشروع بيتعمل
الشاهد ده اللي هوا بيبقى عبارة عن بتاعة رخام محفور عليها
الاسطوانة المعروفة
بتاعة
في عهد السيد الرئيس فلان الفلاني
وفي عهد المحافظ علان العلاني
وفي عهد الوزير سمعان السمعاني
وفي عهد خالتي ام احمد
وهكذا
وفي اخر الشاهد يكتبو
قام السيد اللواء الوزير الدكتور المحافظ
بافتتاح حمام عمومي في هذا الشارع بتكلفة
ستة مليارات جنيه
وكلو في الاونطة
المهم بقا
وانا ماشي جنب المبنى
شفت الشاهد بتاع المبنى ده
ـــــ
ـــ
بس في شاب ربنا يحرسه يارب
كان كاتب تعليق طريف اوي
فوق كلمة
((في عهد السيد الرئيس ))
الاخ ربنا يحميه ويكمله بعقله يارب
كاتب
قبر المرحوم
..
نفسي اعرف مين الشاب ده ؟؟
ـــ
ــ
عشان كده كنت بسأل الاسئلة اللي فوق دي
هل اليوم ده فعلا هييجي ؟؟
وياترى هيبقى عامل ازاي ؟؟؟
ــ
ــ
ده بقا
كاريكاتير بسيط كده
عملته امبارح
صورته بكاميرا الموبايل
مكن تضغط على الصورة للتكبير اذا حبيت
عايز كل واحد
يشوفه ويقولي تعليق مناسب يكون الراجل اللي في الكاريكاتير ده بيقوله
يالا على رأي إنسانة
احسن تعليق هيكسب خمسة وسبعين قرش
وابقو قابلوني

التسميات:

الاثنين، فبراير 12، 2007

أنـــا .... وأخــــــي

يااااااااااه
سبع سنين ؟؟
بجد سبع سنين ؟؟
يعني هاني اخر مرة شفته من سبع سنين ؟؟
هوا الزمن بيعدي بالسرعة دي ؟؟
ــــــــــــــــــــــــــــــ
img512/6874/11022007515to2.jpg


__________
يوم الخميس 10 فبراير سنة 2000
انا واخوتي كنا بنلعب بليل
قدام البيت في السعودية في جدة
..
انا واحمد كنا بنلعب كورة مع ولاد الجيران
وهاني وعمرو كانو بيلعبو بالعجلة
..
حقيقة الايام عدت بسرعة يا هاني
..
طيب لما خلصنا اللعب يا هاني ورحنا البيت نمنا
ليه مصحتش معانا تصلي الجمعة ؟؟
..
سبع سنين يا هاني ؟؟
..
الناس لما كانو بيشوفونا كانو بيقولو علينا توأم
صح يا هاني ؟؟
..
ليه مصحتش معانا تصلي الجمعة ؟؟
..
ـــــــــــــــــــــــــــــــــــــــ
img299/6391/11022007513kg6.jpg


ـــــــــــــــــــــــــــــــــــــــ
احمد وهاني وعلي نامو على السرير
ماما بتصحينا
احمد وعلي صحو
بس هاني مصحاش
..
سبع سنين يا هاني ؟؟
المشهد قدامي اهو يا هاني
ماما بتصحيك
قوم يا هاني يالا
قوم يا هاني يا حبيبي
بس هاني مصحيش
..
بجد هما سبع سنين يا هاني ؟
ياه يا هاني
..
يا ترى يا هاني شفت منظر ماما وهيا بتصحي بابا
وبتقوله الحق هاني ؟؟
وبابا قام مفزوع يا هاني ؟؟
..
يا ترى يا هاني انتا زعلان مني ؟؟
مسامحتنيش يا هاني ؟؟
دنا اخوك الصغير ؟؟
انا علي يا هاني
..
يا ترى يا هاني شفتنا انا واحمد واحنا مفزوعين عليك ازاي
وبابا بيعملك تنفس صناعي ؟؟
بابا بيحب هاني
وبيحب احمد وعلي برضه
بس يا ترى هما فعلا سبع سنين يا هاني ؟؟
..
سبعة يا هاني ؟؟
يا ترى يا هاني شفت منظر ماما وهيا واقعة على الارض والستات حواليها
وهيا بتصرخ
ابني ...هاني ...يا حبيبي يا ابني ؟؟
شفت منظر احمد وهوا نازل القبر معاك وبيدفنك يا هاني ؟؟
احمد اخوك الكبير يا هاني
احمد بيحب هاني
..
هاني
يا ترى شايف الدموع اللي نازلة من قلبي دلوقتي ؟؟
انتا رحت لرب العالمين رب العرش العظيم يا هاني
وسبتنا يا هاني
بس بجد هما سبع سنين يا هاني ؟؟
..
على فكرة يا هاني
ربنا رزقنا بهبة وندى
اخواتي البنات بعد ما ربنا اختارك تكون عنده يا هاني
دول اخواتك يا هاني
بيحبوك والله يا هاني
..
يا ترى بجد مسامحني يا هاني ؟؟
امانة عليك تسامحني يا اخويا
اخوك الصغير يا هاني
سامحني يا هاني
..
احمد وعلي صحو
بس هاني مصحاش
هاني راح فين ؟؟
هاني عند ربنا
هاني طلع لربنا وهوا نايم في اتجاه القبلة
وفي يوم جمعة
..
سبع سنين
سبع سنين مرو من عمري يا هاني
يا ترى لو كنت معايا
كان في حاجة هتتغير ؟؟؟
انتا اكيد مرتاح يا هاني
طب سبتني ليه ؟؟
دنا علي يا هاني
اخوك الصغير يا هاني
..
على فكرة يا هاني
بابا وماما فاكرينك يا هاني
ماما يا هاني
ماما اللي قلبها بيتفطر عليك يا هاني
بابا بيدمع يا هاني
اللي عمري ما شفت الدمعة في عينه
دمع يا هاني
بابا يا هاني
بابا عادل دكتور عادل
بابا يا هاني
..
سبع سنين يا هاني
ومهما مرت السنين
هتفضل في قلبي يا هاني
يا حبيبي يا هاني
سامحني يا هاني
سامحني يا هاني
سامحني يا هاني
دنا علي يا هاني
اخوك الصغير
علي يا هاني
علي
ــــــــ
img249/4017/11022007514gr1.jpg



ــــــــــ
انا واخي
شوق يدفعني لآراها
امي ذكرى لا أنساها
طيف انقا
من زبد الايام ابقى
امي امي امي
همساتها احلى من ناي
سكنت قلبي
كلامتها باتت نجواي
تضئ دربي
لا تنسى اخاك
ترعاه يداك
لا تنسى اخاااك
لو سرقت منا الايام
قلبا معطاءً بسام
لن نستسلم للآلام
لن نستسلم للآلام
لا تنسى اخاك
ترعاه يداك
لا تنسى اخاااك
أنــــا و أخــــي
::
ياريت تسامحوني مش هقدر ارد على اي حد الا لما اخرج من الحالة اللي انا فيها

التسميات:

الأحد، فبراير 11، 2007

اه يا بلد

مش عارف اكتب عن ايه ولا ايه ولا ايه
ماسك نفسي بالعافية
اتكلم عن الاعتداء على المسجد الاقصى
اتكلم عن اعتقالات الاخوان
ولا المحاكمات العسركية
ولا نهب اموالهم
ولا عن حالة ايمن نور الصحية
ولا عن مرور عام على حادثة العبارة
ولازال صاحب العبارة طليق حر
وشرفاء الوطن داخل معتقلات وزنازين مبارك
ولا اكتب عن ايه ولا ايه
وانا اساسا حصلي موقف فظيع
يوم الخميس
اخويا في الله عبد الرحمن كتب عن الموضوع
وريحني بجد
لاني لو كنت كتبت كنت هشتم والعن كتير جدا
الحمد لله الذي لا يحمد على مكروه سواه
انا فرحان اني قابلت عبد الرحمن النهاردة
نزلته من بيته
وخليته يسرح شعره لاول مرة من ساعة ما اتولد
اشطة يا عبد الرحمن
القلوب عند بعضها والله
على فكرة
انا هعمل بوست كئيب جدا جدا
يوم 11 فبراير
ياريت يا جماعة اللي شايل هموم الدنيا ومش عايز همه يزيد
ميدخلش يوميها
وقد حذر من فزر

التسميات: