؛؛ الــخــابـــور ؛؛ في تعديل الدستور
الحزب الوطني
!! عالجزمة
............
انساتي سيداتي اخواتي الفاضلات
كل سنة وانتو متدسطرين
وكل دسطور ودسعجل وانتو طيبين
وعلى رأي اخونا هريدي راعي القهوة الهريدية
!! واركب الدستووووووور .... ..وادستر ..درجن درجن !!
...
.
..
والان نلتقي ببعض الاخوة المواطنين المعفنين
لنسألهم عن رايهم في التعديلات الدستورية
واول جربان معانا
اسم حضرتك ايه ؟
برعي محمد جرجس -
ايه راي حضرتك في التعديلات الدستورية
الاخ برعي يجيب عن السؤال كأنه شايف وحش بري قدامه
بص يا بيه والله العظيم تلاتة -
والله حضرتك انا معرف حاجة عن الموضوع ده
انا لسه جديد في المنطقة هنا
...
..
نروح للمواطن المعفن التاني
اسم حضرتك ايه ؟؟-
ابو كلبة سليم ابن المخلخل
ايه راي حضرتك في التعديلات الدستورية -
ابو كلبة ينتفض من مكانه ويقول باعلى صوت عنده
هوا اللي نعرفه حضرتك هوا ان الريس عشرة على عشرة -
بس
هوا الريس حسني مبارك
هوا مية مية ..واللي بيقولو مية مية
والكبدة صح الصح من طرف اخوكم اللمبي
..
...
نروح للمواطن الجربان الثالث
اسم حضرتك ايه ؟؟
هيثم سامية عنايات ام السعد -
ايه راي حضرتك في التعديلات الدستورية -
حضرتشك التشعديلات دي جامدة مووووووووت
لذيذة تووووو ماتش
تخيل حضرتشك وانا واقف مع البوي فريند بتاعي
وبنتشكلم في الموضوع ده
لقيته معترض وبيقول انه مش موافق على التشعديلات دي
تخيل حضرتك
- الاخ هيثم بيعيط وهوا بيقول الجملة دي -
قولتشله لأأ
الا التشعديلاااات
لحد كده وتقف عند حدودك
احنا لازم نسيب بعض
يعني تخيل حضرتشك سبت البوي فريند بتاعي عشان خاطر طنط تعديلات
وانا موافق موافق موافق
ويالا بااااااااااي
---
شكرا اخت هيث ..اسف اخ هيثم
ويارب ترجع للبوي فريند بتاعك تاني
.....
....
والان نروح للمواطن الفقران الجربان المعفن الرابع
اسم حضرتك ايه ؟ -
هريدي جعيضي جعضيد بسطويسي
ايه رايك حضرتك في التعديلات الدستورية ؟؟
هريدي يرد بانفعال
عليا الطلاج بالتلاتة دي ولية واطية
بجا الست تعديلات ديات اللي روحت حداها امبارح
ومرضتش ترجعلي الخمشتاشر جنيييه اللي سالفاهم مني
قطعت وقطعت سيريتها
-
لا حضرتك انا قصدي -
التعديلات الدستورية اللي عملها الرئيس مبارك
ـ
هريدي يبيرتعش كأن عنده جفاف
عليا الطلاج بالتلاتة دي ولية طيبة وست الكل واميرة -
ده حتى انا سالف مينها طمنطاشر الف جنيه
وهربان منيها لحد دلوجيت
وهيا مكلمتنيش ولا جالتلي ايتها حاجة واااصل
ويابيه عليا الطلاج بالتلاتة اني غلبااااااااان
شكرا اخ هريدي وعوجبال عنديكو يارب
......
....
نروح لمواطن من المواطنين الحلوين المسمسمين
ونسألهم
اسم حضرتك ايه
معاك الشاب الكول مايكل بيتر سيمون -
ايه رأي حضرتك في التعديلات الدستورية ؟؟
واااااااو ...قصدك على النيولوك اللي هيعملوه للدستور ؟؟ -
ده لوووك جااااامد كيييييييك يا مان
بجد فانتاستيك
واجمد من لوك تامر حسني الجديد
فيري نايتي يا مان
يعني حضرتك موافق على التعديلات دي يا مان ؟؟
اوف كورس يا مان ..انا شاب فانكي اشطة كوول بييس يا مان -
ولازم اوافق طبعا على النيو لوك الجديد للدستور
عشان هيخليه دستور كووووول
وانا بحب الكول
والشاب النايتي لازم يحب النايتي
شكرا يا فانكي باشا
ربنا يكتر من امثالك يارب
..
...
مع السلامو عليكو
....
شوية جد كدا
فيديوهات تزوير الاستفتاء
فيديوهات فضيحة بجلاااااجل
صوت وصورة
اتفرج يا سلام
شكرا لكل انسان عمل اللي عليه
ومنع المزورين انهم يزورو صوته
وشكرا خاص لكل مصري قعد في بيته
وساب المزورين يزورو صوته
.....
احدى لجان بلقاس في الدقهلية
مدرسة شها الابتدائية
عميد الكلية بيقولهم روحو وقول نعمين
التسميات: انا الشعب, حلاوتك يا ابيض
كــتــبــهــا واحـــد مـــــن الـنـــاس | 7:35 م
44 CoMMeNtS :
واركب الدستور .... درجن درجن ..وادستر ..درجن درجن
كنا عايزين نعرف تعليق الاخت الفاضلة
تفيدة شفخانى انشكاح على تعديل الدستور ?!
دستور يا سيادنا
ههههههههههههه
الاخت الفاضلة يا عمر اه
:D كل اللي بتسألهم فاضلين وفاضلات يا عمو علي
بس هي دي نهاية التعديلات
والافلام دي احسن دليل ان الشعب ده ولا هنا اصلا
هو لسه في مصر جديد
يا عم بلا خيبه
بلد مايلة
كل تعديل وانت طيب..وعقبال الانتخابات الي هنقول فيها نعم لجيمي بقى وعليك خير
واحب اشكر هريدي ومحمد جرجس والاخت هيثم على دورهم الفعال
بجد يعني...بجد وجداني
ربنا معانا
موضوع غريب ربنا بفرجها علينا قريب إنشاء الله
ههههههههههههه... بوست تحفه..جميل..وعرض آراء كل طبقات الشعب ...اللي راح وقال كلمته بحريه والنتيجه سته وسبعين في الميه
سلااامات
بمناسبة ذكرى المولد النبوي الشريف ،
يسعدني انت انتهز الفرصة لأتقدم بخالص التهاني
وأطيب التمنيات القلبية
لكم والأسرة والأصدقاء ، وكل عام وانتم بخير
عمااااار يا مصر
عايز اقولكم علي حاجه بما اني شفت علي و عارفه فاحب اقولكم الصور دي بتاعته يا جماعه ههههههههههههههههههههههههههههه
ههههههههههههههههههههههههه
و اوعي يا عليوه تزعل و لا الكريوكي يعضك
انا كنت عايز افضحك اساسا و اهي جات الفرصه و اركب الدستور و ادستر ههههههههه
بهراء يا رجاله
بس عاجبني الشاب الفانكي موت بيس كول هاي باي انا شاي اوي يا جماعه بيس جدا
و الفيديوهات دي كوول خالص بتورينا الشباب الوحشين الي بيعملوا الة ادب في الاستفتائات ارحمنا يارب
ايه العظمه دى يا على
والله الحاجه اللى مصبرانى على البلد الفقر دى هى دماغ الناس اللى فيها
تقبل تحياتى واشطاتى وحركاتى وشكرا على زيارتك مدونتى
وكل سنه وانتوا طيبيين...تعالوا ذرونا...باى باى
قالي يا قلب يا مجروح
فضفض.. إبكي.. بوح
إحكي عن المحظور والمسموح
قلتله إزاي أنطق يا لوح
ماانت سرقت صوتي وماعدشي حيلتي إلا النوح
ستين ألف داهية تاخدكم وتروح
بوست جميل قوى بس يعنى ايه دستور انا سامعه الكلمه دى على كل المدونات دى عدوى منتشرة ولازم نطعم منه ولا ايه بالظبط
ههههههه جامد اوى البوست دى...هى دى مصر يا رأفت :ي
معاك الشاب الكووول الدبور
حلوة دي
دستور مين ياعم هو احنا بتوع دساتير بالصلاة علي النبي احنا كل وحد مألف دستور وماشي عليه
وكل عام وانتم بخير
لم يصوت على التعديلات الدستورية سوى أعضاء المحليات وموظفيها والعاملون بها . في الساعات الأولى من التصويت كانت اللجان خاوية من أي فرد يقون بعملية التصويت سوى أعضاء المجالس المحليه وبعض الموظفين والعاملين الذين تم أجبارهم من مديريهم على الأدلاء بصوتهم لصالح الاِنقلاب الدستوري . اللجان كانت خاوية تماما والمشرفين على الاِستفتاء كانوا اِما جالسين على الكراسي في الشمس أو يتحدثوا مع بعضهم البعض عن أحوال الدنيا والناس والتعديلات ونواتجها وبأنهم جميعا (عبد المأمور ) وبأن الناس لن تأتي كما حدث قبل سابق وسابق وسابق منذ خمس سنوات وأكثر قبل المرحوم الملقب بالأشراف القضائي السابق على نزاهة الانتخابات والاستفتاءات . الشئ الملفت للنظر والكيان هو الهدوء الشديد الذي كان يكسو البلاد أو بعض البلاد فالله أعلم بالباقي كذلك مارس الاعلام دوره بان الامور تسير على قدم وساق والمصريون يصوتون لمستقبلهم مع أن الشعب من الأصل لم يخرج من بيته لكي يقول نعم أو لا بأستثناء موظفي الاِدرات التابعة للحكومه والذين طبعا سيقولون نعم لأجل أي شئ في المقابل حتى لو كان بضع من الجنيهات وعلبة كشري . لقد استطاع الشعب المصري ان يؤكد على رفضه لما يحدث أو على لا مبالاته أو ان الامر ليس له أهمية عنده نظرا لأن الحكومه ستفعل ما تريده سواء برأيه أو رغم أنفه . هكذا كان حال شعب مصر يوم الاِستفتاء على الدستور والمؤشرات على ذلك انه في عشية ليلة الاِستفتاء كان الناس مشغولين بشراء حلوى المولد النبوي الشريف واللحمة والله أعلم هل سيجدوا ذلك العام القادم أم لا ؟؟؟
عمــوما كــــــل سنــــــــــــة وأحنا طـيـبـيـن
وحــــلاوة المـــولـــد يـــــــا دســــتــــور
يبقي انت اكيد اكيد في مصر
مع الاعتزار للاغنيه
وبعدين ايه حكايه المدونه بتاعت حضرتك دي انا كل ما اروح في حته اتكعبل فيها
اللهم لاحسد
ما شاء الله ناس كتير بتحبك والنهارده زادو واحد
انا طبعا
والله انا مبطلتش ضحك من ساعت ما ابتديت اقرء البوست
تسلم ايدك
وربنا يصلحلنا الاحوال والناس تستحما وتبطل تكون معفنه زي ما انت واصفهم او مسمومين
قول امين بصوت عالي
وهضيفك يا باشا عندي
خلاص خلاص
متتحايلش عليا
انا بهزر طبعا
ربنا يوفقك
تحياتي
ههههههه
هههههههههه
ههههههههههههه
ههههه
الصور مالهاش حل
والبوست كله جاامد
لأ بجد مسخرررة
ShAb 3AdY
تفيدة انشكاح بتسلم عليك وتقولك كل سنة وانت طيب
منورنا يا عمووووور
AbdElRaHmaN
ازيك يا عبدو
كل سنة وانت طيب
مالهم الاخوات الفاضلات ياض ؟؟؟
انتا شكلك عايز تتضرب
صح ؟
بيسوو
ايه ده ؟؟
بيسو هنا
يا مرحبا يا مرحبا
وان شاء الله نبقى نعمل استفتاء شعبي تاني لما جيمي يدخل الانتخابات ان شاء الله
جتنا نيلة في حظنا الهباب
شباب روش طحن
ياااااااااااارب
منورنا ياباشا
ويارب تنورنا علطول
reri
ادي الحرية ولا بلاش يا ريري
منورانا والله
وعقبال ال
99%
هههههههههه
تحفه با إبني والله .. أحلى بوست قريته الإسبوع ده
هههههههههه
بس طبعا ولا أعرفك .. أنا ماليش في السياسة زي ما إنت عارف
صورك دي؟
يا مصر اكتب إليكي رسائلي
وانت طيب اخي الكريم
واشكر لك مبادرتك اليفة التي تدل على جمال شخصيتك
اخوك علي
ert3ashat said...
عمااااار يا مصر
جمااااال يا مبارك
:)
منورنا ياباشا
copa
ياض لو دي صوري كان زماني انتحرت من ربع قرن يلا
بقا انا اعيش وانا متكهرب كده
روح يا شيخ
وتعالى بسرعة
Iman
الله يكرمك يا ايمان
هذا من فضل ربي
انتي اول ما دخلتي البلوج نور علطول
وانا عمال اقول ايه النور ده
قنديل في قلبي
ايه ده ايه ده
قنديل باشا فنان المدونين بنفسه هنا
يا مرحبا يا مرحبا
كل سنة وانت طيب يا قنديل باشا
ويارب ما تحرمنا من زياراتك يارب
رفقه عمر
اومال انا عامل البوست ده كلو عشان ايه
مش عشان نعرف رأي الشعب المصري المبارك في تعديل الدستور المبارك برضه ؟؟
على العموم الدستور هو كائن يظهر ويختفي وليس بعفريت
يشتعل وينطفئ وليس بكبريت
اخضر وباستك من فوق
nermeen
ربنا يكرمك يارب يا نرمين
منورانا والله
بس مين رأفت ده ؟
الدبور
اي والله
يا سمسم
هوا الشعب المصري كده
زي المصريين بالظبط
يعيش مهما يعيش
ولما يموت يتوفى
مهندس زراعي
ياباشا الفيديوهات فضحت كل حاجة
كل شيجين انكشفن وبان
ودستور يا اسيادنا
منورنا يا باشمهندس
gohayna
الله الله
اللصهم صلي عالنبي
والله يا جماعة انتو هتخلو الواحد يتغبر بنفسه وياخد مقلب في نفسه والله
ربنا يخلييكي يا جهينة يارب
وشكرا على كلماتك الجميلة جدا جدا
ويارب يديم الحب والمودة يارب
وياريت تنورينا دايما بقا
اشطة
Rivendell**
هذا من فضل ربي
منورانا والله
الواحد والله بيفرح لما بيلاقي الناس الحلوة داخلين عنده
ربنا يخلييكي يارب
يا مراكبي
ههههههههههههههه
صور مين ياباشا
حرام عليك
دنا كنت انتحر والله
منورنا يا كبييييييييير
لالالالالالالالالالالالالالالالالالالالالالا
مش ممكن..مش معقول..مش من غير دود
اييييييه دا كله اييييييييه دا كله
عبقريه يشهدها التاريخ
جمعت ال75واللا ال 80 مليون فى السخصيات الهايله دى... بس كويس وافقو يطلعو مالمتحف المصرى ويعملو معاك الحوار الرهيب دا..
رهيييييب والله رهيييييييييب
اكيد المقدم عنخ يبقى جوز بنت خالت ابن عم اخت الجيران.
ياعينى عالناس الواصله دى..وفيديون
وحوارات...اللهم لاحسد.
وبمناسبه اغنيه اركب الدستور احب اهدى اغنيه مدسترة برضو لجمهورنا الحبيب:
سوووو ياسوووو دستوورنا غيروه
وفى العلب خللووووووه
وعقلنا هايلحسوووووه
ولسانا هايحبسووووووه
ومالنا هاينهابووووه
وصوتنا ابداااااماهيسمعووووه
وقلمنا قبل ماتصوتوا غطووووووه
نشكركم على حسن الاستماع على امل اللقاء بكم فى العالم الاخر..
ولادايم الا وجه الله..اهىء اهىء
ةهةهةهةهةهةهةهةهة
علي
مين العيال دي ؟؟
عسسسسسسسسسسسسسللللللللل بوست تححححححححححفه بجد جامد اوى ايه الجمدان ده يا على
عيب ياجدع بلاش قلة ادب احنا بتوع الكلام ده؟اصحى كده وفوق معايا انت دلوقتى طالب جامعى غدا الله اعلم جايز تكون متشعلق ؟خللى بالك مبارك من ورائك وربنا يجعله عامر
SoRsaRaa
سو سا سو
والشعب قرطسوووووه
منورانا يا صرصاااااااااارة
ana ga3an
جعان باشا
يا اهلا يا اهلا
اولا دول مش عيال
دول رجالة ياكلو الزلط
وخصوصا الشاب الكول بتاع السابايكي
بس بجد
دول منهم قرايبي واصحابي
وفي واحد منهم مدون زميل
وهوا اللي قايلي انشر صورته
تصدق ؟.؟؟؟
camera_girl
اي خدعة
نحن نختلف عن الاخرون ..خالص
انتخبوني تجدوني
اخدمكم انا بعيوني
Medo Magdy
الفيديو جااااااااااااامد بطريقة شنيعة
منورنا يا ميدو
أحمد
انا اسف
تبت وانبت وندمت على ما فعلت
لقد صبأ علي
لقد صبأ علي
لا بجد انا قررت اهدى شوية
خصوصا بعد ما عرفت ان مبارك ورائي
هوا اتنا ناقص ؟؟
:)
يا واحد من الناس
عيدك "مباااااارك" هههههه
كل سنة وانت طيب
مدونتك مشاغبة ولذيذة
ممكن تخدمني الخدمة دي؟
انا في الإنعاش وقاللي الدكتور لو ما عرفتش ازاي احمل مقاطع فيديو من النت او من جهازي ، ولو ما عرفتش احمل ملفات صوت وسلايدات في البلوج بتاعي حموت
ينوبك ثواب تقوللي قبل ما فاتورة المستشفى تجيب اخرتي
ههههه سلالالام
اتفضل زور مدونتي ومعاها فنجان القهوة
إرسال تعليق
<< Home