تاج 2 × 1

جالي تاجين في نفس اليوم
تاج من اسلام باشا وتاج من انسانة هانم

وطبعا احنا راضيين بنصيبنا وبالمكتوب

هجاوب على التاجين في بوست واحد

زي ما فى شامبو وبلسم في ان واحد

هيبقا تاجين في بوست واحد

وكما قال الشاعر

رَب تاجين جالولك في يوم واحدِ .. فرد عليهم ولا تكن شلولخا

ولا تكن كالبغل حينما ... لم يجد اكلا فصرخ وتفـنتخا

..........

نيجي بقا للاسئلة الفظيعة الشنيعة المريعة الي في التاج الاول

---------

اية اللي حيحصل لايميلك لما تموت ؟

.. تف من بقك يابني

ان شاء الله ابو علاء

طب إبدأ بسؤال جميل شوية

لان بصراحة اللي يشوف السؤال ده هيموت فعلا

بص يا حلاوة ... ان شاء الله بعد عمر طويل مديد لما ربنا يقدر اني اموت

هبقى عامل حسابي ومدي الباسوورد بتاعي لمراتي

((ده اذا اتنيلت واتجوزت ))

او

واحد من اصحابي هيعلن الخبر على مدونته والناس يعرفو ويعملولي صوان عزا في المنتديات والبلوجات

والناس ييجيو يعزوا بقا

ومش هيقدمولهم قهوة ..عشان هموت وانا مفلس ..مش انا هبقى عاطل مستقبلا ؟؟

والناس الي على الايميل هيعرفو اني مت

وتوتة توتة خلصت الحدوتة

والايميل يروح بس خلاص

---------

اديت الباس وورد لحد قبل كده؟

لا يا خويا ...لسه موصلتلش لمرحلة الهطل المبكر عشان ادي الباسوورد لحد

---------

لو اه كانت طبيعة علاقتك بيه اية؟

متجوزه عرفي يا خويا

---------

اســــــمك؟

علي

---------

اسم الدلع المشهور وسط اصحابك؟

كتييير

علوة - لولو - علي سبايسي ..علي علوكة ..علي الزنديق

---------

برجك؟

وانا صغير كان برج الجدي

بس لما كبرت البرج كبر معايا و بقا برج التيس

لا بهرج

انا برج الجوزاء .واساسا مش بؤمن بالابراج خالص

---------

شخصيتك نوعها ايه؟

هونداي ماتريكس 2006

الرحمة من عندك ياااااااااااااااااارب

بص يا سيدي ..انا طيب اوي ... اجتماعي الى حد ما

مبحبش النفاق ومبعرفش انافق حد

مبهتمش بالكورة وبكره اللي بيتكلمو فيها

بحب اهزر كتير ووقت الجد جد ..مش جد اوي يعني

لما بتنرفز محدش بيعرف انا مين

وبعمل بلاوي والله

كده كفاية

---------

السفر بالنسبة لك؟

بهدلة وقرف في الاول

ومتعة وحلاوة في الوسط

وبهدلة وقرف في الاخر برضه

---------

المود بتاعك؟

حار جاف صيفا ...دافئ ممطر شتاءا

ايه الحاجات الغريبة دي

انا مليش مود معين

بس هادي اغلب الوقت

---------

وقت فراغك بتعمل فيه ايه؟

- اقرا جرايد - اقعد على النت - ارسم - انزل اتمشى شوية - كباية شاي بالنعناع

---------

الاكلة المفضلة؟

الاكلة التي تتربع على عرش مملكة معدتي الكريمة

هي بلا فخر وبلا فشر

الكشري المصري

بس يكون بالبصل

بعشقهاااااااااااااااااااا

بحبو يابااااااااااا

---------

الصفات اللي خدتها من بابا؟

احترام الذات - بغض النفاق واهله - الطول :) - اتكلم ومخافش

التواضع - حب الناس

---------

الصفات اللي خدتها من ماما؟

الطيبة والحنية - الشبه - الرسم - عدم التسرع

يا حبيتي يا مامتشي :)

---------

اكتر 6 حاجات بتكرهها؟

جمال مبارك

ابو جمال مبارك

اللي يتشدد لجمال مبارك

الحكام العرب
الاكل البايت

السيد الاهبل - جارنا اللي ساكن قدامنا

---------

اكتر 6 حاجات بتحبها؟

الاطفال الصغيرين قبل ما يتعلمو الكلام

النت

بابا وماما

الفاكهة

اني اعمل اي حاجة بمزاااااااااج

الكتابات الساخرة

---------

الشغل بالنسة لك؟

الحلم المستحيييل

زي الحب في زمن الكوليرا

---------

ايه الكمبيوتر والانترنت بالنسبة لك؟

افضل وسيلة للتعبير عن ارائك وافكارك بحرية

ويكفي ان مفيش اي رقابة عليك غير من ضميرك

الانترنت ده الثورة الجديدة في العالم

بعد ثورة التكنولوجيا وثورة كفر البطيخ

---------

التاج نمبر تو بقا

يارب يا معين
خمس حاجات ماحدش يعرفهم عني خااالص

يا نهار ابيض

يا دي الفضيحة ام جلاجل يا دي التورت ابو حناجل

طيب دلوقتي الناس اللي يعرفوني في الحياة العامة

لما يعرفو الحاجات دي هيبقى منظري ايه قدامهم ؟؟؟

بس هقول بقا وامري لله

اعترافااااااات خطيييييييييييرة

حاليا بالاسواق

---------

اولا

وانا صغير كنت في السعودية

في المدرسة

في ابتدائي

كنت كل يوم بلاقي فلوس واقعة في الارض

ريال - ريالين - خمسة ريال - عشرة ريال

ومكنتش بقول لاي حد عليها خالص

عشان ماما وانا صغير حكتلي

انها وهيا صغيرة كانت بتنزل الشارع وتلاقي نكلة واقعة على الارض

او مليم

وانها مرة قالت لتيتة على المبالغ الكبيرة دي .فمعدتش بتلاقي فلوس تاني

عشان الملايكة هي اللي بتحط الفلوس دي على الارض

يعني انا لو قلت لاي حد الفلوس هتطير

فانا كنت بلاقي الفلوس من هنا

واحطها في جيبي سكتم بكتم

----------------

ثانيا

وانا في تانية ابتدائي

البلاي ستيشن كان لسه نازل ومكسر الدنيا وغالي جدا جدا

1500

ريال تقريبا

فكنت زي اي طفل برئ

نفسي فيه

بس انا مش من النوع اللي يطلب حاجة

طول عمري والله

في مرة صحيت من النوم بلليل

وقعدت اعيط مع نفسي

واقول يارب انا نفسي في بلاي ستيشن

نفسي

والله العظيم مفيش اسبوع

واحنا في واحد من المولات

كانت في مسابقة

ولقيتهم بيندهو اسمي

وان انا كسبت هدايا بقيمة 2000 ريال

وكسبت البلاي ستيشن

احمدك يااااااااااااااااااااااااااااااااااارب

-----------------

ثالثا

كانت في خصلة معفنة فيا من صغري

اني بعد ما اخلص اكل واشبع

بدخل المطبخ وباخد حتة من اللحمة او الفراخ واكلها من غير ما حد يعرف

طفس من صغري

المهم ان الحتة اللي كنت بسرقها متجيش قد صباع رجلي الصغير

لكن تقولو ايه في الطفاسة

المهم بقا

ان ماما كانت تدخل المطبخ وتتصدم من شكل ورك الفرخة اللي اتاكل ربعه

وتيجي تقولنا مين اللي اكل من الفراخ

انا بقا كنت بعمل نفسي عبدو الاهبل وبقعد اتفرج على التلفزيون ولا كأني عملت حاجة

وفي الاخر التهمة كانت بتتقيد ضد مجهول

بس بطلت الخصلة دي والحمد لله

--------------

رابعا

حاجة فظيعة محدش يعرفها

ان انا الطويل العريض المتنيل على عيني بخاف من الكلاب

و لو في شارع ماشي في فيه كلاب

ممكن اقف مستني ساعات عقبال ما يمشو

بترعب جدا

رغم اني وانا صغير كانو الناس بيفتكروني كلب من كتر حبي للكلاب

بس مش عارف ايه العداوة اللي جت بيني وبينهم على كبر دي

نفسي اتغلب على النقطة دي ياااااااااااااارب

-----------

خامسا

انا بكره كائن حي المصريين بياكلوه اسمه القراميط

اعوذ بالله

والله لما بشوفه بجري منه

حد ياكل سمكة بشنب يا ناس !!!

ليييييييييه

وانا صغير سمعت من بابا ان السمكة دي فيها دودة عشان بتتربى في الترع

وبابا حذرنا منها

المهم بقا ان بابا بياكل القراميط

مش بياكلها بس

ده بيعشقها

وانا بجري من البيت يوم ما يكونو عاملينها

----------

امرر التاجين لكل من

دوار العمدة
أنا جعان
أنس عماد الدين
عبد الرحمن عياش

كاريكا طز

كريم يوسف
حواديت وليد
حكاوي اخر الليل
المهاجر المصري
يــــــاء

بالعربي الفصيح

كركوبة

اروى الطويل

واللي مش عايز يرد براحته

واللي عايز ياخد التاج عنده ياخده

وفوقيه بوسة

اشطة