!!عن الميليشيات الارهابية الطالبانية للاخوان المسلمين

بسم الله الرحمن الرحيم

الاسبوع الماضي ...طفت على السطح

قضية شغلت بال الكثيرين واججت لها بعض وسائل الاعلام

انا شخصيا مكنتش متابعها من الاول نظرا لحالة الوفاة الي حصلت عندي الاسبوع اللي فات

..بس بعد كثرة الجدل عنها

وبعد اعتقال 190 فرد من الاخوان المسلمين منهم 180 من طلبة جامعة الازهر

قررت اني استقصي كل الحقائق عنها

الحكاية وما فيها

هيا عن الاستعراض اللي قام بيه طلبة الاخوان المسلمين في جامعة الازهر

امام مكتب وكيل الجامعة للاعتراض على فصل 6 طلاب لمدة شهر

لمشاركتهم في الاتحاد الحر

صحيفة روز اليوسف القذرة ..والمعروفة بقذارتها صورت الموضوع على ان الاخوان المسلمين ليهم ميليشيات مسلحة

اقتحمت جامعة الازهر وهددت طلاب الجامعة والعميد عشان يرجعو الطلبة المفصولين !!

وسارت على خطاها صحيفة الاهرام بمحررها الامني الفلتة العبقري احمد موسى

وهو نفسه الذي يشارك عمرو اديب تقديم برنامج القاهرة اليوم

واللي اتكلم عن اللي حصل بنفس الصورة اللي صورتها روز اليوسف

صورة من مدونة ميت *

لكن بجد اتنرفزت كتير لما لقيت مدونين محترمين وبحترم ارائهم وكتاباتهم من زمان

بيتبنو نفس الموقف الحكومي وبيقول ان اللي حصل ده مهزلة !!

طيب

نيجي نشوف ايه اللي حصل من البداية خالص

عشان نحكم ونشوف بنفسنا بعيد عن التهويل والمبالغة والتسطيح ايضا

اولا

انتخابت اتحاد الطلبة في جامعة الازهر

امن الدولة يشطب مرشحي الاخوان المسلمين من الكشوف لانجاح المرضي عنهم امنيا

ثانيا

الطلاب الاحرار في الجامعة يقومون بعمل انتخابات للاتحاد الحر يشارك فيه كل الطلبة

ثالثا

نجاح تجربة الاتحاد احر وتنصيب الامين العام والامين المساعد

الخ

رابعا

رئيس جامعة الازهر يفصل 6 من الطلبة المشاركين في الاتحاد الحر

وهم

صهيب شوكت الملط (الأمين العام للاتحاد الحر) وجلال أبو شامية (الأمين العام المساعد)، وكارم السيد ومحمد النجار وعبد الحميد السبخاوي وعمر طلعت.

خامسا

طلاب جامعة الازهر يعترضون على هذا القرار الارهابي

الذي وقعه رئيس الجامعة بفصل هؤلاء الطلبة الذين يمثلون طلبة الجامعة كلها

ويقررون عمل اعتصام منظم امام مكتب رئيس الجامعة للضغط عليه للرجوع عن فصل الطلاب

تم قفل بوابات المدينة الجامعية لمنع الطلبة من الخروج للجامعة

كسر الطلبة قفل البوابة وذهبو الى مكتب وكيل الكلية

للمطالبة برد حق زملائهم المفصولين من الجامعة

احد فقرات الاعتصام

كان عبارة عن عرض مسرحي شارك فيه اقل من عشرين طالبا

العرض عبارة عن استعراض لمهارات الالعاب الرياضية الكونغوفو والكاراتيه وغيرها

وقام به عدد من طلبة كلية التربية الرياضية

يمكنك مشاهدة هذا الفيديو للتأكد بنفسك

هذا كل ما حدث

قد تتسائل الان ...اذا كان هذا كل ما حدث

فما كل هذا التهويل والتضخيم الذي قام به البعض

وما هذا الهراء الذي قيل عن جيش للاخوان المسلمين في مصر

وميليشيات ارهابية تحتية تكفيرية طالبانية بتنجانية !!

المصيبة ان الطلاب

نفو بشكل قاطع التهمة التي الصقتها بهم روز اليوسف واخواتها

واعربو عن اسفهم لان الاستعراض الرياضي الذي قامو به تم فهمه بهذا الطريقة

يعني مسابوش اي حجة لحد

ومع ذلك

تفنن عتاة الاجرام الصحفي في الهاء الناس عن القضية الاساسية وهي تزوير اتحاد الطلبة وقمع وفصل

كل الطلبة الاحرار

بشغلهم بقضية مصطنعة وهي جيش الاخوان في مصر !!

والمصيبة هو انجرار بعض الناس وراء هذا الكلام

متأثرين بالهجوم الذي تقوم به الالة الاعلامية الضخمة للنظام المصري

وانا بنفسي شاهد على هذا الكلام

ففي عزاء جدتي رحمها الله وجدت خالتي تتكلم عن هذا الموضوع

وتصف ما قام به طلبة الاخوان بانه مهزلة !!

وقتها لم اكن اعرف كل ما حدث

ولكن كان هناك خلفية لدي عن تزوير انتخاات اتحاد الطلبة والتضييق الامني على طلبة الجامعة

وبعد التقصي عن الموضوع وقراءة كل وجهات النظر والاراء

عرفت الحقيقة بنفسي وتناقشت مع العديد من الاقارب والاصدقاء في هذا الموضوع

....

اول من اشارت الى هذا الموضوع كانت صحيفة المصري اليوم

والتي ساهمت في نشر هذه الصورة المغلوطة عن الاعتصام

والتقطت منها الخيط روز اليوسف وحرضت واججت ضد الطلبة

وصدر القرار (( من فوق )) باعتقال هؤلاء الطلبة و اللي يتشددلهم

انا اتفق مع الاخ محمد عادل في تحميل وزر هؤلاء الطلبة لصحيفة المصري اليوم

نعم

دمهم في رقبتك انت يا مجدي الجلاد

اهالي هؤلاء الطلبة الاحرار تذرف عيونهم بالدموع ويدعون على الظالم المتجبر في الارض

انضم الى اخي محمد عادل واقول

بإسمي وبإسم كل طلاب جيل العزه وكثير من طلاب الإخوان المسلمين وشباب الإخوان المسلمين ، أطالب المصري اليوم بإعتذار للمعتلقين ، بالإضافه إلي المساهمه في حمله من أجل الإفراج عن المعتلقين

وانا حقيقة استغرب

اين هؤلاء الذين انتفضو وثارو للدفاع عن حق عبد الكريم نبيل سليمان في التعبير عن رأيه

وناصروه وايدوه ورفضو اعتقاله ؟؟

اين انتم من اعتقال 180 طالبا من الاخوان المسلمين

لماذا لم نراكم تنتفضون و تعلنون تأييدكم لهم ؟؟

اين الاخوة رافعي راية الحرية والديموقراطية ؟؟

اين هي البانرات التي تطالب بالافراج عن المعتقلين ؟؟

ادعوكم جميعا لتبني حملة على مستوى المدونين المصريين

للافراج عن هؤلاء المعتقلين

وهذ اضعف الايمان

حسبنا الله ونعم الوكيل

-----------------

تحديث : اللينك ده في تقرير شامل عن اللي حصل

مكتوب فيه معظم اللي اتنشر على النت اللينك اخدته من

Dr_Oss

الدكتور اسامة

تحديث 2 : ياريت كلنا نشارك بتوقيعاتنا في حملة مطاللبة المصري اليوم بالاعتذار

وتبني حملة للافراج عن هؤلاء الطبة المعتقلين

لينك الحملة

تحديث 3 : شهادة حية لاحد الطلبة وهو الطالب احمد هندي

الامين العام المساعد بالاتحاد الحر لكلية اللغات والترجمة في جامعة الازهر

احمد غير منتمي للاخوان المسلمين

وروى هذه الشهادة في مدونة سوسة المفروسة

تعليق احمد الاصلي رقم 42

Islamist Bloke باسم

نص الشهادة

--------------

بسم الله الرحمن الرحيم
أولا احب اقولك يا سوسة انى معجب جدا جدا بتفكيرك وعقلك وذكائك الخ الخ الخ

....وكان نفسي من زمان اكتب لك تعليق بس ما سمحتش الظروف قبل كدة لكن دلوئتى لازم اقولها لك.
اعرفك بنفسي الأول..قارىء متعصب جدا لسوسة وشبه محب كمان يا ستى ومتصفح يومي لصفحتك على أمل ان تكوني قد كتبتي شيئا جديدا.
وبالاضافة لذلك فانا الأمين العام المساعد لاتحاد الطلاب الحر بكلية اللغات والترجمة جامعة الازهر.
اسمي احمد هندي....ومش اخوان عشان تكوني عارفة توجهاتي من البداية.
ياريت لو تسمحي لى احكي لك الموضوع من البداية.
البداية زي ماالكون كله عارف -واسألى مخلوقات كوكب زحل - ان طلاب الاخوان راحوا يسحبوا استمارات الاتحاد المعين لقوها ما بتتسحبش غير لاخواننا اياهم..طلاب الامن الحلوين الشاطرين اللى بكرة يطلعوا فى اعلانات جمعية جيل المستقبل بتاعة جيمي.هاجوا وعملوا اعتصامات ومظاهرات وافلامات وما من مجيب.قرروا يعملوا اتحاد حر وطبعا الحوار معروف.فى يوم الاتحاد الحر ده انا اتعرفت على حامد عبد السلام وهو شاب من الاخوان بس اعرفه انه محترم جدا من زمان وانه ملتزم وهادي كدة...كلمته وقلت له انا عندي خبرة فى حوارات الانتخابات دي وعايز ادخل الاتحاد الحر ده وياريت اترشح وكمان انا عضو سابق بحزب الغد وكفاية كمان يعني خبرة تمام فى مشاوير المظاهرات...رحب جدا وقال لى روح للجنة الترشيح وفعلا رشحت نفسي وعملت دعاية انتخابية ووزعت ورقة اسمها مشاكلنا هاسيبها لك كوبي وبيست هنا فى الموقع فى كومنت تاني..المهم الحمد لله الكلام خرج من قلبى ووصل لقلوب الشباب وساعة فرز الاصوات لقيت اكتسااااااح لاسمي واسم حامد فى انتخابات اللجنة الثقافية والدينية وبعدين عملنا تصويت على مين يكون الامين المساعد ومين يكون الامين وفاز حامد بالامين وبعدين فزت انا بالامين المساعد والقيت كلمة حلوة وحامد القى كلمة حلوة وانا شايف كاميرات حبايبنا الحلوين شغالة تمام وبتسجل وواحد تاني بيكتب الكلمة اللى قلتها املاء يعني العبد لله بأة على صفحات الجرائد-سورى على صفحات أمن الدلوة(استعارة من سوسة)..بعدها بيومين لقيت جواب طلب حضور لمجلس تأديب رحت وحضرت المجلس كان بصراحة فيه ارجل دكاترة فى الكلية وقعدنا اتكلمنا وفضفضت لهم عن كل مشاكل الطلبة وقالوا لى انت شاب مشرف ومحترم و وسيم وسمبتيك وابن حلال(لا لا دول من عندي)المهم رأفوا بحالنا وعجبهم منظرى فى البدلة الشيك والكرافتة البرتقالى-ابن ناس اوى- وادونا انذار وانتهى الموضوع بالنسبة لى لغاية كدة وقلت همارس نشاطى فى السر وتمضى الحياة والطلبة عارفين انا مين.
تاني يوم عرفت ان زمايلنا فى باقى الكليات اتفصلوا ولما قلنا لهم اننا مخدناش غير انذار مصدقوش لان كلهم -مع انهم مضوا على اقرار تنازل عن الكيان المسمى بالاتحاد الحر- الا ان كلهم صدرت لهم قرارات فصل شهر او اسبوعين وضاع عليهم العملي يا ولدي.
بداوا يعملوا مظاهرات واعتصامات من تاني عشان يرجعوا وكل ده واحمد الطيب ماشي بامر الأمن لدرجة ان الامن لما ضرب بنت فى المدينة الجامعية لجامعة الازهر بالشلوت وبالجزمة احمد الطيب ما اتدخلش الا لما الامن طلبه وقالوا له الطلاب هيدمروا المدينة الجامعية لو ما جيتش واعتذرت.
المهم سيبينا من الحقير ده....بعدها بكام يوم لقيت هشام-عصفورة امن الدولة اللى دايما قاعد على باب الكلية-جاي لى وبيقولى الباشا قائد الحرس بيقولك وصل لصحابك من الاخوان انهم لو ما لموش نفسهم هندخل لهم بلطجية باسلحة ومولوتوف جوة الجامعة وهنربيكم ونضربكم بالجزمة الخ الخ الخ)
ولما كلمت صحابي لقيت الكلام وصل لهم فى كل الكليات بنفس الطريقة....بعدها بيومين كان يوم الاعتصام الشهير والطلبة واقفين فى المدينة الجامعية مش ادام مكتب رئيس الجامعة كما يعلن ويذاع..وعاملين اعتصام مدته 6 ساعات ..واحنا واقفين لقينا بعض الاخوة بيقولوا عايزين نعمل اى حاجة يا اخواننا اى اكشن كدة عشان الناس ما تنامش فى الاعتصام فتقدم (واحد من الاخوان) وهو شاب ذكى ظريف لطيف الخ الخ الخ باقتراح انهم يعملوا استعراض زي بتوع حماس فى القدس ويعملوه كام واحد من تربية رياضية ويكون فيه كونغ فو او كاراتيه او اى منظر كدة يشد الطلاب ويقفوا يتفرجوا لان كله بيدخل اوضته من البرد...المهم فى خلال 5 دقايق كانت فيه الاقنعة اللى استخدموها فى استعراض السنين اللى فاتت فى مشاهد مسرحية عن حماس وكدة....جابوا الاقنعة وروابط صامدون والكلام ده وعملوا الاستعراض اللى طلع غبي اصلا لانهم مكانوش عارفين يعملوا الكاتا 1 و 2 اللى بيعملها اى واحد معاه حزام ابيض او اصفر فى الكاراتيه يا خالتي...المهم اللى حصل ان كان فيه صحفى من المصرى اليوم واقف وحب يعمل سبق صحفي قام خد الصور الجميلة وطبعا الشباب الازهرى الصعيدى او بتوع وجه بحرى بيفرحوا بالتصوير ويقولك واحد بيصور يا بوى والصور طلعت تاني يوم بالمشهد الجميل اللى شفتيه....بعدها الدنيا قامت طبعا والحاج شوبير بتاع الحزب الوطني ظبطها اكتر واكتر وعمك حمدي بتاع المصرى اليوم والحاج كرم جبر وطبعا الشيخ سيد اوكيه والدكتور احمد الشرير رئيس جامعة الازعر خدوا التعليمات الحلوة من الامن انكم افتحوا النار على الحوار ده....طبعا الغلطة الغبية اللى وقع فيها بعض الطلاب انهم ادعوا ان الموضوع ده كان بترتيب مسبق للرد على تهديدات الامن وادعوا انه كان استعراض للجان الردع النووى -اسف قصدى البشرى- لتهديدات الامن..كل ده زاد الطينة بلة وكمان عمو عاكف طلع قال ان ده مجرد اسكتش مسرحي -وهو فعلا الحقيقة-لكن هو جاب الكلام بصيغة تخلي اصغر عيل ميصدقوش ولولا انى شاهد عيان على الموضوع من الاول للاخر مكنتش صدقت اى حاجة....المهم بعدها كلنا توقعنا ان صهيب (الأمين العام للجامعة)يتفصل نهائى او حتى الامن يخطفه فقلنا له خلى بالك ومتنزلش لوحدك وتنزلوا من مبني الصفا جماعات ومتنزلوش تصلوا فى المسجد حتى...لكن اللى حصل كان فوق كل توقع...30 عربية امن مركزي واكتر من 1500 جندي هجموا علي الطلبة الساعة 2 بالليل ونزلوهم بهدوم النوم ومعصوبين العين كمان وخدوا كل فلوسهم وحاجاتهم ولفقوا لهم اسلحة وفلوس وكتب تنظيمية والغباء الحكومى طبعا خلاهم يلفقوا لهم 10شيكلات اسرائيلية يعني فيه تمويل صهيوني للاخوان يا ناس!!!!!!
المهم ان النار اتفتحت على الشباب دول وهم من احسن الناس...بجد الشاب منهم وشه منور من الصلاة وكلهم طلبة طب وصيدلة وهندسة ولغات وترجمة ومن احسن الناس...يبقى يتعمل فيهم كدة؟
انا لولا انى مناهض لفكر الاخوان من المبدأ ولكل فكر الجماعات عموما مع انى نفسي فيه-لكن الجماعات حرام شرعا وده موضوع تاني يا سوسة نبقى نتكلم فيه بعدين...لولا كدة كنت انضممت للاخوان لمجرد النكاية فى الحكومة العبيطة دي.
عموما للحديث بقية لكن انا حبيت أوضح لك الموضوع لان يصعب عليا ان كاتبتي المفضلة تكون الحقيقة متعمية عليها كدة وبعدين انا اقسم بالله العظيم ان شهادتي صدق وانى مش بحاول اجمل الامر من ناحية طلاب الاخوان لكن هى دي الحقيقة مجردة وانتى مواطنة حرة فى بلد حرة ولازم تعرفى الحقيقة الحرة.

والسلام على من اتبع الهدى
أو: بلاش الجملة الاخيرة دي لحسن تفتكريني من الاخوان يا ستى.
أقولك:وختاماً..لك ألف سلام

(بتاعة عبد الحليم ولو انى مبحبوش)
سلام يا سوسة

انتهت الشهادة