احنا اللي دهنا الهوا دوكو

اول امبارح

وانا بدور على حاجة جنب الدولاب بتاعي

لقيت كومة ورق جرايد

معظمه كان الاهرام والجمهورية

طبعا زمانكم بتتسائلو ليه ورق الجرايد محطوط هناك

فطبعا لازم اجاوبكم واطمنكم

بان الحاجة والدتي بتعين ورق الجرايد عشان بعد كده بتستخدمه الاستخدام الشعبي الامثل ليه

وهوا كبديل للمفرش بتاع السفرة

المهم

في وسط كومة الجرايد دي لقيت صفحة التحقيقات في الاهرام

عاملة حوار مع وزير الري الحج محمود ابو زيد

والمانشيت الرئيسي للحوار بيقول

غسلنا نهر النيل بمياه الفيضان

انا شوفت المانشيت من هنا

ووقعت من طولي من الضحك

بجد مش قادر اتخيل

ايه ده

يا جماعة هوا يقصد مين بكلمة ((غسلنا )) ؟.؟

بجد انا مش عارف

لو كان التصريح ده في جرايد المعارضة

كان زماني قلت انه متفبرك

لكن دي الاهرام

وعاملينه مانشيت رئيسي

...

طيب يا جماعة

حد لاحظ ان تلوث النيل ومياهه قل ؟؟

حد لاحظ ان النيل اتغسل فعلا

الوزير بيقول انه غسل النيل

يا ترى النيل اتغسل بجد ؟؟

الراجل بيقولك غسلنا النيل بمياة الفيضان

انا كان نفسي اشوفه صراحة وهوا بيغسله

اكيد المنظر ده كان تحفة

تخيلو فخامة الوزير ماسك الاريال

((ولا بلاش الاريال عشان المقاطعة ))

خليها رابسو

ماسك الرابسو وقاعد قدام الطشت عمال يغسل في النيل

وطبعا مستخدمش مية الحنفية ...لا

هوا وزير بيحافظ على مية بلده ومش عايز يهدرها

فعشان كده استخدم مية الفيضان

تصريح عبقري صراحة

وفي تصريح احلى منه كمان في الحوار بيقولك ايه

احذر من ان اراضينا الحالية لن تكفي سوى لتوفير طبق سلاطة عام 2050

مقلناش سيادة الوزير عن الاسباب اللي ادت لده

ولا حتى هوا ناوي يعمل ايه عشان يواجه المشكلة دي

يعني بيحذرنا وبيقولنا اخبطو دماغكم في الحيطة

يعني يا ناس الناس دلوقتي مش قادرين ياكلو لحمة ومتنمردين

بكرة مش هتطولو السلطة كمان

عشان تعرفو قيمتي يا ولاد ال$^$#^ يالا يا شعب يا ابن الشعب

ابسط وفرفش

سيادة الوزير مش حارمكم من حاجة

..

كلمة الى فخامة جلالة عظمة غبطة

سيادة الوزير الوطني الديموقراطي

راعي الفكر الجديد ابو علبة حديد

اللهم اني صائم