الاقصى نادى والندى غالي ...ويهون عشانه العمر لو غالي
وَاحِـــدْ مـِــنْ الـــنــَــــاسْ: كبسة يا عادلي
ايوة انا  .. في حاجة يا عماد ؟
NaMe : Ali Adel
FroM : el ManSoOorRa , Egypt , Agda3 Nas

طالب جامعي حاليا ..عاطــل مستقبلا

ana Meen ba2a ?

الأحد، نوفمبر 12، 2006

كبسة يا عادلي

طبعا كلنا شوفنا وسمعنا وقرينا وشمينا عن حوادث الاغتصاب الجماعي اللي حصلت في وسط البلد في القاهرة
وطبعا كلكم شفتم بيان وزرة الداخلية عن ان كل شيء تمام ومفيش اي شيء حصل خاااااااالص
وان الامن مستتب ... والرعية بكل خير...وكله بفضل القيادة الرشيدة حماها الله ..الله الله
ومكنش في اي دليل مادي على حوادث الاغتصاب دي غير شهادة شهود العيان في برنامج العاشرة مساءا..
لان الصور اللي صورها وائل عباس في جريدته مبينتش غير حاجات قليلة جدا ..ولو هوا ده الدليل الوحيد...يبقى فعلا مفيش تحرشات ..مفيش غير زحام بين الناس في يوم العيد
وطبعا الاخوة الموالسين في الحزب الوثني طلعو بكلامهم النفاقي المعهود..عن ان كل ما قيل عن التحرشات وحوادث الاغتصاب..ما هو الا محض هرائات ..وتخيلات من الحادقين الطبقيين اصحاب النفوس المريضة ...الذين يريدون النيل من امن واستقرار مصر ...
طبعا الحكاية انتشرت في مصر كلها ...
النهاردة بقا ..جايبلكم فيديو ....بتوريكم ازاي ان حوادث التحرش دي حصلت العيد اللي فات..على مرأى ومسمع باشوات الداخلية ...كلاب حسني مبارك ...ومحدش فيهم اتحرك ..ولا قام من على كرسيه حتى
ليه ؟؟
لانهم خلاص ...اتعودو على التحرش ده من زمان ...وبقا حجة عادية عندهم ..
وعلى رأي المثل خلي الشعب يعيش ...
التحرش اللي عمله رئيسهم جمال الشاعر مدير امن القاهرة الحالي ومساعد وزير الداخلية على سلالم نقابة الصحفيين ...لما انتهك عرض الصحفيات والمتظاهرات في 25 يونيو 2005 يوم تزوير استفتاء حسني مبارك
ويوم انتفاضة القضاة .... خلاص بقت عادة
فطبيعي جدا انهم يشوفو التحرش ...ولا يتحركو ...ولا يعملو حاجة...لانهم على رأي الدكتور محمد القدوسي ..
امن النظام...مش امن الشعب .ول حتى طالو انهم يبقو امن دولة ...
وللاسف احنا مش النظام....احنا الشعب ...
كبسة يا عادلي ..ويا حسني
الفيديو

5 CoMMeNtS :

Blogger saso Said To Me :-

مش هاعرف انزل الفيديو لاسباب كومبيوترية لكن المسلي اني لما انفعلت اوي السنة دي صحابي قالولي ان ده حصل بشكل اسوأ السنة اللي فاتت وفي التحرير برضة.. طيب لما هيا عادة مصرية صميمة ماقلتوش ليه حتي من باب الشفافية
غير الاخ منتصر كتب حاجات ظريفة جدا كانة من سنغافورة البلد مش من هنا.. عن المبالغات والامان في مصر وحاجات كده.. مادام مش متاكد بتكتب ليه.. شكلك ايه دلوقتي لما اعترفوا ان كان في تجاوزات زي ماسموها
يلا كل عيد واحنا طيبين ونبقي نقفل وسط البلد خالص او نكتب علية احذر منطقة موبوءة مع تحيات ادارة الامن المركزي بتوع المظاهرات بس

12:44 ص  
Anonymous غير معرف Said To Me :-

منك لله

قعدت عشر ساعات انزل فيه وفى الاخر المحاولات فشلت

عموما ..لعله خير انه منزلش
لان ضغطى كان هاينزل معاه

الحمد لله على كل حال واعوذ بالله من حالك يامصر فى دا الوقت

10:43 ص  
Blogger واحـــد مـــــن الـنـــاس Said To Me :-

نورتو المدونة يا زعرورة ويا ساسو
بجد شرفتونا ..وانستو ونورتو
على فكرة الفيديو مش للتحميل
للفرجة بس :)
والله انا مليش دعوة بس الموقع بتاع التحميل كده بس
يعني اضغطو على اللينك ...وهتلاقو صفحة جديدة تتفتح معاكم
وهتشوفو الفيديو
وفي برنامج لتحميل الفيديو شفته على بلوج بس ناسي اسمه
ان شاء الله اجيبه ليكم

على فكرة ...التحرش الجنسي ده موجود منزمان فعلا..لكن مكنش بالطريقة دي ابدا ابدا ابدا ...احنا الظاهر بنرجع ورا وبنتخلف في كل حاجة ماعدا الحاجات دي ...بنتطور فيها وبنطور اساليبنا واستراتيجياتنا !!

بس بجد البلد وصلت لحالة فظيعة شنيعة مريعة !!!

ويا زعرورة ...حاولي تشوفي الفيلم من غير تحميل
لانك هتقعدي تحسبني وتقولي لا حول ولا قوة الا بالله
وهتقعدو تدعو على القفا الكبير
منه لله القفا ده ..هوا السبب :(

9:52 م  
Blogger 3rby Said To Me :-

بص يا واحد من الناس
الامن فعلا بقه لخدمة النظام فقط
عرفت انت حوار تغيير شعار"الشرطة في خدمة الشعب"
من علي ابواب الاقسام وخلوه:"الشرطة والشعب في خدمة الوطن"
صحيح فيه واحد رفع قضية واجبرهم علي ترجيع الشعار القديم
لان الجديد غير دستوري
بس اللي عاوز اقوله انهم عاوزنا نبقي في خدمة مبارك...هم مش قصدهم الوطن..قصدهم مبارك

3:03 م  
Blogger واحـــد مـــــن الـنـــاس Said To Me :-

يا عربي باشا
نورت المدونة والله
على فكرة انا بتابعك من زمان
من قلب ما اعمل مدونة حتى

وربنا يكون في عون المصريين
وربنا يكون في عونك يا مصر
مصر المهروسة

9:31 م  

إرسال تعليق

<< Home