اتحاد طلبة الحزب الوثني يرفعون الشوم في وجه الجميع

الكلام ده حصل في كلية احد اصدقائي

حصل في جامعة عين شمس

وتحت بصر وحماية قوات حرس الجامعة

الطلبة بتوع الاتحاد المزور هناك ((اعضاء الحزب الوطني الواطي ))ىراحو ودخلو الجامعة بالشوم .

وراحو ضربو الاخوان المسلمين ..في مؤتمر كانو عاملينه

وطبعا امن الجامعة كان نايم في الكازوزا ..ده اذا مكنش مصهين عليهم اساسا

وبالصور ..

طلبة الإتحاد وقد تسلحوا... بالشوم لا بالعلم

شهد اليوم مواجهات عنيفة بين طلاب الإتحاد المعين وطلاب الإخوان بكلية التربية جامعة عين شمس أثناء فاعليات مؤتمر دعا اليه طلاب الإخوان بعد منعهم من سحب أوراق الترشيح لانتخابات اتحاد الطلاب أمس .

ولقد كان من المقرر أن يقوم طلاب الإخوان بكليةالتربية بسحب أوراق ترشيحهم أمس من مقر رعاية الشباب غير أنهم فؤجئوا بنفس السيناريو والذى تضمن بمنعهم من سحب أوراق الترشيح من خلال طلاب الإتحاد المعين والذين قالوا لطلبة الإخوان "انتم واقفين فى الممنوع.. وامشوا من هنا أحسن لكم "غير أن طلاب الإخوان لم يتركوا أماكنهم بالصف وساعتها كشف طلاب الإتحاد عن نواياهم ،فأخرجوا عصى وأسلحة وشوم كانوا يخفونها داخل ملابسهم وبدأو بضرب طلاب الإخوان ما أدى لحدوث اصابات لطالبين .

وأكد محمد مصطفى أحد طلاب الإخوان بالكلية ما حدث وقال أن ما حدث بالأمس تم تحت سمع وبصر ادرة الكلية وعلى رأسهم الدكتور أحمد يونس (المشرف على الإنتخابات بالكلية) وأضاف محمد مصطفى قائلا توجهنا لعميد الكلية الدكتور عبد العزيز الشخص لرفع الأمر اليه ووعدنا ان يقوم هو بنفسه بسحب أوراق الترشيح لنا غير أن هذا لم يحدث . ودعا طلاب الإخوان اليوم الإثنين لمؤتمر بساحة كلية التربية للتنديد بمنعهم من سحب أوراق الترشيح أسموه(جرب تعيش حر)حيث بدأ بآيات من القرآن الكريم تبعه بكلمة طلاب الإخوان المسلمين والتى ألقاها الطالب سيد ناجى والتى أكد فيها على حق طلاب الإخوان فى ممارسة نشاطهم داخل الحرم الجامعى كذلك حقهم فى الترشح لإنتخابات اتحاد الطلاب مستنكرا موقف الإدارة والأمن وقال "حتى متى تقف ادارة الكلية وعلى رأسها عميد الكلية موقف المتفرج من الإنتهاكات التى تحدث . وقبل أن ينتهى المؤتمر توجه عدد كبير من طلاب الإتحاد الى مكان انعقاد المؤتمر الطلابى وقالو لطلاب الإخوان" امشوا من هنا أحسن نولع فيكم" وسط سباب وألفاظ جارحة لطلاب الإخوان فى محاولات لإفساد المؤتمر لكن طلاب الإخوان لم يعروهم اهتماما,

طلبة الإتحاد وقد اقتحموا المؤتمر بالأسلحة البيضاء

وفى تمام الثانية ظهرا توجه عدد كبير من طلاب الإتحاد تعدى 90 طالبا الى مكان انعقاد المؤتمر وهم يحملون شوم وأحزمة واسلحة بيضاء بهدف التعدى على طلاب الإخوان وهو ما نجحوا فيه حيث تحولت ساحة الكلية الى ما أشبه بالحرب وقف فيها طلاب الإخوان يدافعون عن أنفسهم بأيديهم الفارغة بينما تطالهم ضربات البلطجية وطلاب الإتحاد بواسطة الشوم والسيوف والسنج والمطاوى .

احد الطلبة المصابين

وأصيب ثلاثة من طلاب الإخوان بجروح وهم الطالب ابراهيم الشحات (جرح قطعى فى الرأس )كما أصيب الطالبين محمد أبو عيشة ومحمد وفيق بجروح قطعية فى اليد . كما توجه الطلاب المصابين الى مستشفى المطرية العام لعمل تقارير طبية رسمية ولرفع محاضر بالشرطة ضد طلاب الإتحاد والبلطجية

..: الــنــصــابــيـــن اهـــمـــا ...4

دي مجموعة مواضيع كنت نشرتها في القسم السياسي في منتدى الديفيدي العربي
وكلها من كتابتي الشخصية وتصويري

حبيت انقلهالكم وياريت تقولولي رأيكم

-

-لو الصور مش بتظر ..اكتبولي في الشات بوكس -

بسم الله الرحمن الرحيم
دي الحلقة الرابعة من الــنــصــابــيـــن اهـــمـــا
وكل سنة وانتو طيبين
بمناسبة عيد الفطر السعيد ...
وربنا يعيد علينا العيد واحنا حالنا احسن من كده

المهم بقا

الحلقة دي جايبلكم صورة معبرة اوي اوي
بتدل على الحالة اللي وصلت لها مصر ...
بسبب حكم حسني مبارك المزمن ليها
بجد بتدل على ازاي وصل بينا الحال
لدرجة ان المنافقين الافاقين الحرامية بقم بيتقلدو ارفع المناصب في الدولة
وهما اللي حاكمين البلد
الصورة بتاعة النهاردة ...فيها كمية كذب ونصب فظيعة
لكن المرة دي بقا
سرقة..ايوا
سرقة في وضح النهار
ومين بقا اللي بيسرق هقولكم
لان لو الكلام اللي في الصورة دي حقيقي
فمفروض ان اللي بيسرقنا هوا : رئيس الجمهورية ...
ولو الكلام الي فيها مش صحيح
يبقى رئيس الجمهورية ومحافظ الدقهلية ونائب المنصورة السابق نصابين وكذابين ودجالين
ايوة ....
مستغربين
طيب
تعالو معايا وشوفو الصورة

ده منظر للصورة من بعيد ....الصورة عند نادي الحوار في المنصورة ...
صورة كبيرة ....ملفتة بشكل كبير
نادي الحوار ده على ما اظن لسه مفتوح قريب اوي
(1)


ايوة ...هيا البعيدة دي اللي مكتوب عليها كلام كتير
نقرب شوية للصورة ...
(2)




ايون ...هيا الصورة دي اللي بيظهر فيها صورة على اليمين لحسني مبارك ...وعلى الشمال صورة نائب المنصورة السابق ممدوح فودة ....
(3)


شوفو بقا مكتوب عليها ايه
(4)


هدية السيد الرئيس محمد حسني مبارك لشعب مدينة المنصورة
مشروع الصرف الصحي بالمشاية والعشوائيات

مع تحيات د. احمد سعيد صوان محافظ الدقهلية
اهداء شركة النقيطي
السيد ممدوح فودة نائب المنصورة ..

...خلاص
خلاص يا مصريين ...عشنا وشفنا
ان مشروع الصرف الصحي ...اللي من فلوس الشعب ...ومن تعب الشعب ..ومن جهد الشعب ..
بقا هدية من السيد الرئيس !!!!
خلاص !!!
للدرجة دي وصل النفاق ؟؟؟
يعني انا كنت مستغرب زمان لما كان احمد سعيد صوان محافظ الدقهلية بيصدع دماغنا بكلمته ان 5 مليون دقهلاوي بيقولو نعم لمبارك ...
لكن الظاهر انه حب يزود جرعة النفاق والموالسة ...
فتخيلو !!!
افندينا بيقدم الهدايا والعطابا للرعية يا مصريين
عندي اسئلة بسيطة
هل فلوس مشروع الصرف الصحي ده من جيب الريس عشان يبقى هدية منه ؟؟؟
يعني المشروع بقى هدية من مَن لا يملك ..الى اصحاب الحق
طيب لو كان من جيب الريس فعلا ...يا ترى سيادته جايب منين فلوس المشروع ده اللي هيبعزقها على الشعب ؟؟
من البنزينة مثلا ؟؟
طيب ده معناه ان الريس حرامي ...ايون ...اللوحة دي بتقول ان الريس حرامي ...
طيب اومال ايه ؟؟
طيب لما مشروع الصرف الصحي ده مش من فلوسه
كاتبين ليه انه هدية منه ؟؟؟؟
بيكذبو علينا ؟؟؟
يعني الريس كذاب ؟؟؟
الريس نصاب ؟؟؟
ما هيا يا كدا يا كدا ....
بالله عليكم ...في نصب اكتر من كده يا ناس ؟؟؟
طيب ناخد لفة صغيرة على مين اللي حاطين الصورة
احمد سعيد صوان محافظ الدقهلية ... مزور انتخابات مجلس الشعب ضد مرشحي الاخوان المسلمين ..
ممدوح فودة نائب المنصورة السابق عن الحزب الواطي ....اسطقت عضويته في المجلس بسبب هروبه من التجنيد

على فكرة ...انا بكتب الموضوع ده وانا عندي مغص في بطني .....
مش قادر استحمل والله
طيب انا عايز تعليقاتكم ...
الموضوع خفيف صحيح
بس انا كنت مفروض اكتب كلام كتير
بس للاسف . مش عارف
لساني معقود ...
متنسوش لما تعدو على الصورة ...تتفو عليها
وتقولو باعلى صوتكم ..الــنــصــابــيـــن اهـــمـــا


اه يا بطنييييييييي

لمشاهدة الموضوع بالصور والحجم الكبير

..: الــنــصــابــيـــن اهـــمـــا :... 3

بسم الله الرحمن الرحيم
كل سنة وانتو طيبين
ويارب العيد يبقى سعيد عليكو وعلى كل المسلمين يارب

المرة دي الصور مختلفة نوعا ما
هيا صحيح موجود زيها كتير في مصر
بس انا لما شوفتها استفزتني كتير
انا كنت بتمشى مع اصحابي على شارع المشاية
واخدتها مشي من كوبري الهابي لاند لحد كوبري الجامعة اللي في مدخل المنصورة ((مسافة فظيعة ))في خلال مشي بقا
شفت بلاوي كتير
طبعا في شارع المشاية قدام المحلات كل محل حاطط يافطة
عليها صورة الثلاثي المرح : مبارك .. ومحافظ المنصورة احمد سعيد صوان ...ونائب المنصورة بالتزوير ابراهيم الجوجري
واكيد كل الاعضاء اللي من المنصورة عارفين كدا
بس الصور دي كتير بدرجة فظيعة
طبعا عشان البلدية متشيلش اعلان المحل المخالف من على الرصيف المخصص لمرور المشاة
فاصحاب المحلات بيلجأو للوحات النفاق والموالسة عشان يعملو دعاية لمحلاتهم


انا مش هتكلم عن الصور دي دلوقتي
انا هتكلم عن صورة معينة موجودة نادي الجزيرة
في بدايته مخصوص
((رجاء الانتظار حتى تحميل الصور ))


(1)
دي صورة للموقع من بعيد

((عشان متقولوش اني حارمكم من حاجة ))


ايون
شايف اليافطة الكبيرة اوي اللي على اليمين دي ؟؟
ايون
اللي فيها اللي ميتسماش وهوا بيشاور بايده ..
طب نيجي نقرب منها عشان تعرف انا مقهور ليه ؟؟

طيب
شوف كده
(2)

((معلش الصور مش واضحة اوي عشان بلليل))



ايون هيا دي
طبعا انتا مش عارف تقرا الكلام اللي فيها عشان مش واضح
ولا يهمك
انا صورتهالك صور كتير والله

شوف يا سيدي مكتوب ايه

(3)




مكتوب بالصلاة عالنبي

((عليه الصلاة والسلام ))
فوق صورة المحروس ...بالبنط العريض
مبارك لمصر ....ومصر لمبارك

وتحت صورة المحروس مكتوب
اهداء من الحاج : عبد الله انيس
رئيس مجلس ادارة الجمعية التعاونية للنقل بالسيارات بالدقهلية

(4)


طبعا اكيد كتير منكم سمع كلمة مصر لمبارك ومبارك لمصر دي على السنة منافقي الحزب الوطني الواطي
سواء في مؤتمرات حزبية او صحف موالسية او حتى مواقع الانترنت والمنتديات

طبعا انا كنت فاكر ان الكلمة دي محدش من المنافقين يستجري يحطها في يافطة في مكان عام
يعني اخرتها تتقال في مؤتمرات بالروح والدم نفديك يا حسني
لكن توصل الجرأة ب عبد الله انيس انه يعمل لوحة من المال العام
ويكتب فيها مصر لمبارك
فدي في حد نفسها جريمة كبيرة اوي اوي اوي
جريمة في حق مصر
مصر يا بشر
مصر يا مصريين
المنافقين بيقولو على مصر انها لمبارك !!!
انا ممكن افهم انهم يقولو ان مبارك لمصر
على اعتبار ان كل المصريين لمصر
لكن انهم ينسبو مصر البلد العظيمة ...لشخص محمد حسني مبارك !!
فدي جريمة اهانة دولة ...جريمة احتقار شعب وحضارة عظيمة
مصر بحضارتها الاسلامية العظيمة ...مصر اللي انجبت عظماء العالم في اوج ازدهارها
مصر التاريخ ....مصر بلدنا ووطنا
ينسبوه لشخص حسني مبارك ....مصر بقت عزبة مبارك يا ناس !!
للدرجة دي وصلت كمية النفاق والموالسة ؟؟
لدرجة ان الشخص اللي اسمه عبد الله انيس عضو الحزب الوثني هوا وبقية اعضائه يقولو على مصر انها لمبارك!!
وبعد كدا بيتقمصو لما بنتريق عليهم ونقول عليهم حزب وثني !!!
طيب بالله عليكم
ده مش توثين للحاكم ؟؟؟
ده مش تأليه ليه
لما اعضاء الحزب الواطي يقولو على مصر انها لمبارك
مجرد انهم يقرنو اسم مصر باسم مبارك في سطر واحد اساسا دي فضيحة
ده حتى لو كان مبارك ده افضل حاكم في العالم
فكون انهم يقولو مصر لمبارك دي مصيبة
فما بالك ان مبارك كذا وكذا وكذا ؟؟؟ََ!!!
قمة الحقارة والدنائة والقذارة من شلة المنتفعين اعضاء الحزب الوثني ...اكرر الوثني
انا لما شفت اسم عبد الله انيس ده افتكرت حاجة تانية
عشان شفت لوحة تانية ليه في جمصة ايام المصيف
كان كاتب عليها
: لن نرضى بغيرك بديلا ...
وحاطط صورته هوا ومبارك
كان حاططها قدام فيلته ....
وطبعا كله من فلوس الشعب ....
انا مش عارف اساسا ازاي واحد زي ده يعطي لنفسه الحق بانه يتكلم بلسان الشعب المصري ويقول
: لن نرضى بغيرك بديلا .!!!

ايه ده ؟؟؟
الناس دي للدرجة دي بتستحقر مصر ...وبتستهون من شعب مصر
يا ناس
انا عشت لليوم اللي لقيت فيه مصر بلدي
بيقولو انها بتاعة مبارك
مصر بقت لمبارك يا مصريين
يعني انتو يا مصريين عبيد مبارك
ايوة
ما انتم الا عبيد احسناتنا
ودي عزبة مبارك وابنه جمال
ومش عاجبك قدامك حلين
يا تهج من البلد
يا اما تشرفهم في اقرب معتقل من معتقلات حسني مبارك

دلوقتي لو حسني مبارك ورث الحكم لجمال ابنه
ولا حد يقدر يفتح بقه
ما هي مصر بتاعة مبارك
يورثها ...يبيعها ..يحرقها ...بلدو وهوا حر فيه ...
ومتستغربش لو عشت ليوم من الايام وشفت عبد الله انيس ده
بيلهج بالشكر والثناء للرئيس وابن الرئيس
وبيطالب بان جمال مبارك يحكم عشان يستكمل المسيرة...
انا عارف انكم حاسيين بمرارة ....زيي بالظبط
طب بالله عليكم ....الموضوع مش يستاهل انكم تحسو بمرارة ؟؟؟
يعني هنفوق امتى
بلدنا .. خلوها بتاعة مبارك
فلوس مصر بقت بتاعة مبارك وابن مبارك

((هتفهم قصدي لما تشوف الحلقة الرابعة ...هتشوف قمة الفجور النفاقي ))

بس بعون الله ...مهما عمل المنافقين والوثنيين الجدد ....مصر هتفضل مصر ..

مصر بتاريخها وحضارتها
مصر بشعبها وابنائها
مصر اللي ذكرها الله سبحانه وتعالى في القران الكريم
مصر هتفضل مصر
مصر اللي حكمها حكام قذرين ...وحكام كانو اعدل اهل الدنيا
وهتلفظ كل الحكام الخونة الفسدة زي ما لفظتهم زمان
وكل الخونة المنافقين مساحي الجوخ عبدة السلطان بياعين الضمير
ومهما عملو ...هنفضح افعالهم القذرة ... وحركات النصب والتدجيل على الناس البسطاء
ان شاء الله ..

طب اقولك حاجة
ارجع تاني وشوف الصورة فوق
ايوة ارجع عايزك تقرا كل الكلام تاني

واخد بالك عبد الله انيس ده كاتب اسمه ازاي ؟؟
كاتب : الحاج عبد الله انيس
تخيلو يا شباب مصر
الراجل ده مسمي نفسه ...الحاج

الحاج
طب قولولي اقول ايه
عايشين في زمن ....شيخ المنصر ...كاتب اسمه الحاج ...
شالله يا حج عبد الله انيس
يا جماعة الصورة دي بالذات استفزتني بجد
وان شاء الله اعضاء المنتدى اللي من المنصورة لما يعدو عليها المرة الجاية هيلاقوها مكسورة
انا هحاول اكسرها ان شاء الله
لاني مش مستحمل ضغطي يرتفع كل ما اشوفها
لاني بحس اني ولا حاجة
بحس اني مجرد عبد مملوك لمبارك وابنه
وانا شخصيا ...مرضاش على نفسي ابقى كده
ودي مش اول مرة تتكسر صورة نفاق زي دي
قبل كدا صحابي كسرو صورة كان مكتوب عليها مبارك الرخاء
و الله معك يا مؤسس مصر الحديثة
كانت صورة صغيرة متعلقة على عمود نور
وكان تحتيها واحد شحات ((شايفين الرخاء ؟؟))
قامو كسروها بالطوبة ..مع انهم لا ليهم في سياسة ولا حاجة
هما بس كانو بيطلعو الكبت تقريبا
...بس يارب مكسرش اليافطة من هنا ...الاقي اللي بياخدني من قفايا من هنا

قولولي رأيكم في الصورة ..وفي كلمة مصر لمبارك ...وفي كلمة الحاج ....ويا ترى ..اكسر الصورة ولا لأ؟

وربنا يستر ..

..

اه نسيت ...متنسوش لو حد صادف انه عدى جنب الصورة دي في يوم من الايام
يتف عليها ....ويقول باعلى صوت ... الــنــصــابــيـــن اهـــمـــا

لمشاهدة الموضوع بالصور والحجم الكبير

2.: الــنــصــابــيـــن اهـــمـــا :...:

دي الحلقة التانية من سلسلة مواضيع ..النصابين اهما
المرة دي جايبلكم صورة مفيش اي بني ام عايش في المنصورة مشفهاش قبل كدا
لانها ببساطة محطوطة في اهم موقع في المنصورة
واكيد كل اعضاء المنتدى اللي من المنصورة شافوها قبل كدا

الصورة دي موجودة عند تقاطع شارع بورسعيد مع شارع البحر ...قدام كوبري طلخا علطول وفي نفس الوقت جنب مديرية امن الدقهلية
صورة كبيرة جدا ... متعلقة في جزيرة في نص الشارع

انا صورتهالكم ... وهوريلكو الصور
((رجاء الانتظار حتى تحميل كل الصور ))

دي صورة مصورها وانا واقف على كوبري طلخا .

(1)

اكيد الاعضاء اللي من المنصورة افتكروها
ايوة هي الصورة دي

الصورة اللي بيظهر فيها حسني مبارك وهوا رافع ايديه بعلامة النصر وبيضحك


(2)

ومكتوب تحتها
ادارة سينما الجزيرة بنادي الشرطة بالمشاية
تهنئ شعب مصر بالقيادة الحكيمة

(3)

((قارنو حجم الصورة بحجم العامود ...وشوفو فلوس مصر بتروح فين ))



وفي الصورة نفسها مكتوب
مبارك لمصر


عايزكم بقا تركزو في الصورة اوي اوي اوي

(4)


لان الفضيحة جاية في الطريق اهي


خلاص ...شفتو الصور ؟؟
طيب عايز حضراتكو تشوفو الصورة دي
دي صورة افيش فيلم السفارة في العمارة لعادل امام
وتقارنوها بالصورة ...

(5)




ايوا
قارنو الصورة رقم 6 بالصورة رقم 4
وهتلاقو الفضيحة

(6)



الاخوة النصابين في سينما الجزيرة في نادي الشرطة في المشاية
ملقوش صورة حلوة لحسني عشان يحطوها في اهم حتة في المنصورة
فقامو مركبين وش حسني على جسم عادل امام في افيش فيلم السفارة في العمارة
على اعتبار اننا شعب بهايم ومش هنهرشهم

مركبين صورة حسني مبارك على صورة عادل امام يا ناااس
مش عارف مين العبقري صاحب الفكرة الجهنمية دي ؟؟

للدرجة دي وصلت درجة استغفال الشعب والمواطنين ؟؟؟
للدرجة دي وصلت درجة النفاق والتملق
انهم يكبرو صور مبارك على صورة عادل امام
عشان الصورة تطلع حلوة ؟؟؟
للدرجة دي بيعاملونا على اننا سذج وقطيع من البقر الاثيوبي ؟؟؟

دلوقتي قدامنا نموذج فذ للنصب والتدجيل على المواطنين
يعني مش كفاية صور مبارك مالية الشوارع وكلمات النفاق نازلة زي المطر
لأ ...مركبين له صور كمان

مش هنتكلم عن ايه فايدة وضع صورة لحسني في نص الشارع وفي مدخل مدينة المنصورة
واللي مفروض تتحط فيها علامات ويفط ارشادية بدل صور النفاق والموالسة

ولا هنتكلم عن مين اللي دفع تمن اللوحة دي وهل هيا من المال العام ولا منين بالظبط
ومش هنتكلم عن كلمات الموالسة من امثال ..مبارك لمصر ...والقيادة الحكيمة ...

((مين حكيمة دي ))

لا ...
هتكلم عن المبدأ نفسه ....كون انهم ينصبو على المواطنين
ويحطو صورة مركبة لحسني مبارك في الشارع ...وياريت في اي شارع .

لا ..ده في اهم منطقة في المنصورة

..
هما دول بقا النصابين
هما دول الضلاليين
هما دول الموالسين


دلوقتي ..زي ما شفنا في الموضوع اللي فات
اي حد هيشوف الصورة دي ...او صادف انه هيشوفها ...يتف عليها ..
ويقول باعلى صوته

(( بلاش المرة دي باعلى صوته عشان الصورة جنب مديرية الامن ))

ويقول ...
الــنــصــابــيـــن اهـــمـــا

لمشاهدة الموضوع والصور بالحجم الكبير