مع نفسي

هوا انا اتغيرت ؟؟

بجد انا اتغيرت ؟؟

مقدرش اقول معرفش

لاني فعلا عارف .. انا دلوقتي مش علي بتاع زمان

حاجات كتيرة اتغيرت ... حاجات كتيرة اوي اوي

الواحد كل ما يعيش كل ما يتعلم اكتر من الحياة

الواحد بيقابل ناس كتير اوي اوي .. بيعرف شخصيات كتيرة اوي اوي

الحقود ... الحسود ... الهجاص .. المهياص .. المصحلجي ... العبيط .. الاهبل ...المتمرد .

في ناس اول مرة تشوفهم .. او تكلمهم .. بتعرفهم على حقيقتهم .. وتختار .. يا تبعد عنهم .. يا تكمل معاهم .

في ناس بتعرفهم كتير اوي اوي ... ومش بتكتشف عيوب شخصياتهم الا بعد ما تتلسع منها

ممكن يكون اقرب الناس ليك بيشتغلك وبيحور عليك ؟؟

ليه لما تتعامل مع واحد بطيبة وبحسن نية .. بيتعامل معاك على انك اهبل وساذج ؟؟

لازم تبقى شكاك يعني وتشك في كل اللي حواليك .. وتعتبر نيتهم مش صافية .. عشان محدش يشتغلك ؟؟

..

انا صحيح اتغيريت

لو حد شافني من سنة ونص ..وجه يشوفني دلوقتي .. هيقول ده مش علي اللي اعرفه .. ده واحد تاني

يمكن ...

انا صحيح اتغيرت .. انا عارف كده بيني وبين نفسي

بس من رأيي .. ان انا اتغيرت للافضل ... للاحسن

ولسه هتغير اكتر .. ولسه حاجات كتيرة اوي اوي اوي هغيرها فيا

..

ممكن اكون اتغيرت للاسوأ من وجهة نظر ناس كتير اوي اوي

بس بيني وبين نفسي .. انا متأقلم مع نفسي كده

..

ساعات لما الواحد بيتصدم .. الصدمة بتقلب معاها يا اما باكتئاب يا اما بتغيير جذري

انا قررت مكونش فريسة للاكتئاب ... انا اتغيرت .. وهتغير

افكار كتير اوي شلتها من دماغي .. وجت افكار تانية بدالها

حاجات زمان حلفت ان عمري ما هقربلها ولا هعملها .. ودلوقتي بقت من اولوياتي

..

بس يا ترى هل كده انا صح ؟؟؟

انا حاسس اني عمري ما كنت صح في حياتي ابدا

عمال اتنقل من غلط لغلط

يا ترى فين الحق؟؟

..

بكل اسف .. حاجات كتيرة اوي في زماننا ده مقلوبة .

الصح بقا غلط ..والغلط بقا صح

ولو حد شاف حد بيعمل حاجة صح .. بس مش مألوفة .. يعيب عليه

ويقوله انتا بتعمل كده ليه ؟؟

..

عموما انا في فترة قصيرة اوي اوي .. اتصدمت كتير اوي .. واتلسعت كتير اوي .. ومن ناس كتير اوي ..

بس الواحد مش بيتعلم الا كده

..

انا اسف اني مردتش على التعليقات في البوست اللي فات .. ولا جددت اي حاجة في المدونة من فترة .. بس ظروف والله

وكل سنة وانتم طيبين