..: الــنــصــابــيـــن اهـــمـــا :...

ان شاء الله
اتمنى من كل زوار المدونة انهم يشاركو في الموضوع ده
ايه بقا فكرة الموضوع ؟؟

ان شاء الله ..
كل واحد يجيب صورة اويحكي على شيء شافه في مدينته او بلده ..الشيء ده عمله نصابين او ضلاليين
يعني مثلا ...الاشياء من نوعية...لوح التأييد للرئيس او لاعضاء الحزن الوطني

او اي لوحة يحس انها بتضلل الناس وبتنصب عليهم
بحيث ان كل واحد يبقا ماشي في الشارع ويشوف الاشياء دي ويقول
النصابين اهما
الحاجات اللي بقولكم عليها موجودة في كل قرية ومدينة مصرية
انا جبتلكو حاجة لذيذة اوي النهاردة

الصورة دي موجودة في مدينة طلخا في المنصورة
اول ما تطلع من الكوبري اللي بيوصل طلخا بالمنصورة
هتلاقيها في وشك علطول

ايه بقا الصورة دي ؟؟





الصورة كاملة ..من هنا

ايوا بالظبط ..
واحد اسمه عبد الظاهر السقا ...شكله لاعب رياضي او حاجة زي كده
حب يعمل دعاية عن نفسه ..وحب يتمنظر على اهل بلده
فكر في حاجة حلوة اوي
القرع

ايون ..هوا القرع ...طبعا لو اي حد جاب لوحة بعشر تلاف جنيه وفيها صورته ..وحب يعلقها في الشارع ..عشان يعمل دعاية لنفسه ...
البلدية هتيجي تشيلها علطول ... وهتيجي تقولهم ليه ؟؟...يقولك طلع تصريح ...
وتروح تطلع تصريح ...يقولك جيب ورقة من الحتة الفلانية والمكان العلاني ...
ويلففوك البلد كلها...وفي الاخر يقولوك فوت علينا السنة الجاية الساعة 7 الفجر
يعني ابقى قابلني
لكن بقا اخونا عبد الظاهر السقا ...لما حب يعمل دعاية عن نفسه
وعشان البلدية ميتجرأوش ويشيلو صورته
قام يا اخواننا حاطط صورة الريس في اللوحة...وجنبيها كلمتين نفاق وموالسة
هما : مبارك يا مبارك ...حب هذا الشعب
مش عارف الجدع ده يقصد ايه بالكلام ده ...محسسني انه بيدلع عيل صغير وبيقوله
مبارك يا مبارك ..يا كوتوموتوووووو... يا حب هذا الشعب انتا ..يا حب هذا الشعب
وحط صورته طبعا وتحتيها اسمه
وقام معلقها (( وضع يد )) في اهم حتة في طلخا
عشان يشهر نفسه
ده نموذج بسيط لعضو في الحزن الوطني ...منافق ضلالي ...
حب يشهر نفسه ويعمل لنفسه مكانة اجتماعية بالكذب والنفاق والتضليل وخداع الناس والالتفاف حول القانون
لكن احنا كده بنفضحه ..قدام الناس
وكل واحد شاف الصورة دي أوصادف في يوم انه شافها
يتف عليها ...ويقول باعلى صوته
الــنــصــابــيـــن اهـــمـــا

..انتظرو الصور القادمة..فضائح الحزن الوطني في المنصورة ...كمية نفاق وموالسة..ليس لها مثيل ...
انتظرونا